北京直擊！iPhone 5s 實試 Home掣認指紋

早兩日Apple發布iPhone 5s和5c之後，好多本地網民話新機冇太大突破。雖得承認iPhone 5s無論外形、大細、重量都跟iPhone 5相若，但小記在北京首趟舉行的Apple發布會試玩過後，無論64-bit架構下的操作反應、Touch ID指紋辨識的實用性，都幾討人歡心，一切改進盡在細節裏。

iPhone 5s售價：$5,588（16GB）、$6,388（32GB）、$7,188（64GB）

內地「影子」發布會

今次Apple兵分幾路搞新iPhone發布會，除了在美國總壇外，還首度於中國搞「影子」發布會，即是受邀中港台傳媒齊集北京睇美國發布會錄影片段，而且播完片後仲即刻有iPhone 5s和5c真機試玩。新機一如所料用上4吋屏幕，而且機身設計跟iPhone 5相若，不同的是換上新色，除保留銀白色機身外，還將原來碳黑色轉成太空灰色，另追加金色版本，鍾唔鍾意就睇大家喜好。

A7處理器行得順

小記現場試玩的iPhone 5s已預載iOS 7系統（iPhone 4以上或iPad用家可於美國時間9月18日免費升級），介面設計雖然有點卡通化，但使用上都幾方便，譬如按兩吓Home鍵進入預覽畫面，可睇到Multi-tasking的多個頁面，只需將頁面拉走即可將其關掉。iPhone 5s轉用性能比上代高一倍的A7處理器，並首次以64-bit處理，運行Apps的流暢性大為提升，最抵讚係新iPhone 5s將會一出機就預載《Keynote》、《Pages》、《Numbers》、《iMovie》及《iPhoto》這幾個自家軟件，計落可慳番三百幾港元。

登錄指紋需時大概兩分鐘，之後便可透過指紋進行解鎖。

在照片顯示模式上，可依拍攝的地點及日期分門別類。

現場試玩手指解鎖

不少人覺得800萬像素iSight鏡頭唔多夠用，幸好新機鏡頭設計及影相功能都有改進，如光圈由F2.4提升到F2.2，感應器面積加大並加入防手震功能，對應連拍及慢動作攝錄等，並用上雙LED閃燈改善低光環境下的拍攝效果。另一新功能Touch ID指紋辨識亦屬焦點所在，小記試玩時，系統會先要求用家在Home鍵按幾次確認指紋，之後再用手指的不同邊緣位置重複做辨識程序，成功後即可以手指代替數字密碼登入手機，甚至可應用到App Store或iTunes Store付款，確實幾方便。

iOS 7對應Multi-tasking多工處理，關掉工作只需一拉即可。

拍攝介面有改進，可拉動畫面揀選拍片或影相時的比例。

新iPhone預載如《Keynote》及《iMovie》等自家Apps。

Lo哥︰今鋪炒唔起！

新iPhone抵港，除了機能和設計外，最多人關心當然係炒唔炒得起。先達G-World Mobile負責人Lo哥表示︰「由於今次與中國同步開賣，所以來港掃貨嘅人會少好多，預計iPhone 5s及5c每部只有數百元水位，主要是食人民幣差價，如iPhone 5s 16GB內地賣RMB5,288人仔，折約HK$6,690左右，比香港賣HK$5,588貴。當中預計銀白色5s，以及黃、藍兩色5c較好炒。」

iPhone 5s提供太空灰、金及銀白3種顏色，當中金色較為突出。	iPhone 5s（前）換上雙LED閃燈設計，iPhone 5（後）則只有單LED閃燈。	為iPhone 5s而設計的皮版保護殼，除圖中的棕色版外，還提供5色選擇，每款$298。
雙LED閃光燈（右）能拍攝到色溫更準的影像，明顯比一般手機閃燈（左）質素高一班。	發布會後設有產品體驗區，傳媒都搶住試玩iPhone 5s。