潛水攝錄 鏡頭捕鯨鯊

水面練習兼計劃

本身為攝錄師的Raymond，認為初學者最常犯的錯誤是浮量控制。「由於攝錄器材落到水會輕咗好多，身體同隻手夠定先控制到部機，所以拍片基本功要紮實，如果水面拍得唔好，落到水底更難拍得好。」事前準備亦相當重要，要搞清楚拍攝主題、物種等，他強調：「因為落到水冇機會畀你換鏡頭，事前要諗定用乜鏡和Settings，仲要考慮影片主題，皆因好多新手見到乜就拍乜，結果條片要花好多時間作後期整理。」

伴潛打燈更理想

除了攝錄技巧外，潛水時的安全亦相當重要，Raymond建議水底拍片最好結伴同行。「同伴的作用不僅是互相照應，仲可以做『燈僮』幫手拎燈，由於水底有好多肉眼睇唔見嘅微粒，如果光線從正面射埋去會好礙眼，有同伴便可由佢拎燈打Side Light。」若果冇「燈僮」點算好？他還有一招絕技：「假如得一個人拍片也可一隻手揸機，另一隻手揸燈，從旁打燈營造出立體光線。」

攝錄器材 <入門級> Action Cam售價：$3,000~$5,000

<玩家級> DC連防水殼或防水DC售價：$5,000~$10,000

拍片熱點不留痕

唔少人為了美化構圖，蓄意破壞海洋生態環境，有廿多年潛水攝錄經驗的Stephen強調：「拍片最基本是唔可以帶走海底任何嘢，甚至拍片者本身都盡量唔好有大動作，以免嚇親海洋生物，無謂為了拍一個Shot而破壞環境。」初學潛水攝錄者，可先到本地海岸公園練習技巧，如海下灣、東平洲等已被劃為海岸公園，禁止捕魚等行為，故水中生物較多，常見有小丑魚、珊瑚等。

<專業級> 單反連防水殼售價：$20,000以上	背心加氣樽 雖然氣樽有20磅以上，但落到水會變輕，每次可潛1小時左右。	潛水鏡 潛水鏡可加裝近視鏡，近視者一樣可享受潛水樂趣。

與巨型鯨鯊同行

玩到有番咁上下經驗，便可挑戰外國水域，Stephen指出：「到外地潛水其實可以兩手空空，因為潛水熱門地點均備有潛水器材租借服務。如果用慣私伙裝備嘅玩家，可自備潛水鏡、呼吸調節器等，再喺當地租借氣樽等重型裝備。」當中最難忘一次潛水拍片經驗，是在馬爾代夫拍鯨鯊。「嗰次好好彩，用了大約2小時就遇到鯨鯊，雖然佢哋體形龐大，但性情友善。拍片時記得唔好有太大動作或呼出太多氣泡，並計算其游走路線，咁就好容易近距離拍攝到佢哋。另外要盡量避開其尾部，免得被打中發生意外。」

各式蛙鞋 方便於水中移動，分着Boot款（右）和非着Boot款（左）。	水底拍片時，一隻手揸機，另一隻手揸燈，光線會較為立體。	潛水歷險會的課程總監Stephen（右）和水底錄影導師Raymond（左）表示，不破壞生態環境為水底拍片的首要條件。

器材一覽

潛水器材最基本要有氣樽、潛水鏡和蛙鞋，約$600即可租用整套裝備（連船費）。至於攝錄器材則豐儉由人，想畫質好啲可揀單反加潛水殼，不過需投放的資金較多；若Budget唔多的話，不妨選擇DC加細潛水殼或防水DC，適合遊樂式潛水拍攝。講到便攜性和實用性，如GoPro HERO3等Action Cam是近年興起的拍片之選，還能用於其他極限運動上，一物多用。

PADI水底錄影師課程

無論本地抑或外地，水底拍片最基本是持有PADI開放水域潛水員檢定卡（證書）或其他合格檢定卡（證書）。潛水歷險會備有「PADI水底錄影師」課程，讓潛水發燒友熟習水底拍片技巧，而$1,800專修課程費用只包理論課，3次下潛及海上實習費用另計。

查詢電話：2572 2138

網站：www.divinghk.com

撰文：黎子豪

攝影：謝孝祥（部分相片由受訪者提供）

模特兒：Kimi（M.Spy Model）