Robot魂龍星丸魔神再現

拿拿林做晒功課睇《魔神英雄傳》，成為一眾80後的集體回憶，不過當年嘅模型唔係人人買得起，為此Bandai上年翻叮Robot魂龍王丸及邪虎丸。既然初代主角機出齊，輪都輪到續集嘅終極主角機龍星丸登場，機身跟足原著可變成飛龍形態，童年回憶返晒嚟。加埋稍後推出嘅河馬師傅戰王丸，魔神英雄再次召集！

售價：$609

飛龍變形傳神

玩家對Robot魂龍星丸最關心的，想必是金黃機設配色。礙於當年鑄模技術所限，Takara模型版的金件是以啤膠製成，表面滿布水紋，膠感十足；Robot魂新作終於解決此問題，採用啞金黃色設計，連紅色膊頭及白色四肢也轉用珍珠色，整體雖未至於閃閃令，但不失貴氣。飛龍變身機關亦跟足原著，先將背部龍頭展開伸出，再上下倒轉將機械人頭變成龍尾，雙手扭出龍爪，雙腳變成羽翼，過程簡單流暢。可惜龍頭是屈在背部用背甲虛掩，設計有點求其。配件方面只得一把光龍劍，連上次龍王丸附送的出招特效都欠奉，玩味跌咗Watt。