潮玩單車Light Painting 曝光捉影

花式幻變成光軌

喜歡到香港不同地方夜攝的Will，適逢有商場大搞沙田單車夜，獲邀作夜景拍攝；但就咁影活動又冇乜挑戰，為了增加Gimmick和趣味，他靈機一觸將單車夜攝與Light Painting結合。Will表示：「單車Light Painting難過普通光影塗鴉好多，要事先度好踩單車路徑和花式。」採訪當晚小記約埋Will到科學園示範，他二話不說便踩出幾個S形拐彎。「另外仲有Z形，甚至蚊香形等，單車技術差少少都難以流暢地完成動作。」其後小記同Will仲用兩架單車合作玩花式，再加上車身唔同顏色嘅LED燈，原來單車加Light Painting可以玩出好多變化。

DC細機一樣玩到

未玩過Light Painting嘅初學者如何入手呢？Will表示，各位可將相機調至較易掌握的快門先決模式；如果是影開相嘅玩家，則可用手動模式，並將光圈和ISO收到最細，以延長快門曝光時間。至於實際拍攝時間要視乎踩車花式的長短，一般調校到15~20秒。器材方面，唔好以為只有單反大機先影到靚相，其實Will自己都係用無反細機。「任何機款只要有長時間曝光設定，即使係DC，甚至手機App，都可以影到單車Light Painting。」當然，拍攝完少不免要執相，他會以《Photoshop》後期調整白平衡，將色溫調冷便可令原本偏黃的相片變得自然。

搵個高位Set好相機，就可以踩單車喺鏡頭前駛過，長曝之下便產生光軌。

影單車Light Painting基本有部相機和腳架就搞掂。Will選用NEX-5R無反相機加廣角鏡頭，「Wide Angle有助表現透視感，進一步加強單車光軌的張力。」

靚相要訣

除了基本相機設定，Will仲提供了一些單車Light Painting要點供各位參考：

Will表示，LED燈條於鴨寮街百幾蚊有交易，仲有不同顏色選擇。	試相區 如果想在Light Painting最後「見樣」，要抓啱時機，於尾段停車。	「溜出鏡頭的光影」係另一玩法，在快門關上後才將單車溜出畫面便有這樣效果。

1. 一般手機的補光燈都可以玩Light Painting，惟燈光只有一點。建議玩家考慮LED燈條。

2. 拍攝Light Painting必備減光濾鏡，因為它可幫助延長快門時間之餘，也能避免過曝問題。

3. 想拍攝完整的單車光軌，最緊要揀一個高處由上而下影落去，例如行高幾級樓梯已有較佳效果。

4. 由於需要在單車徑上做出不同花式，一旦冇單車經過便應立即拍攝，否則構圖隨時被「單車甲」破壞。

踩車活動推介

新城市廣場將於10月12日舉行慈善單車夜「綠逐義行」，屆時參加者可體驗沙田風光之餘，兼可為香港防癌會籌款，極具意義。有興趣者可由即日起至9月27日到網址www.newtownrider.hk 報名，名額1,200個。

同期另有多場「主題騎行之旅」，當中8月24日及9月21日的夜攝騎行更由Will領隊，教大家玩單車Light Painting。而香港單車專門店將為參加者提供裝有燈具的單車。參加辦法為於新城市廣場內作任何消費並繳交報名費$220，名額各20個。

查詢電話：2684 9175

LightBomber 手機捕光畫

Will提到普通手機App都可玩Light Painting，相信好多人都有興趣試吓。以iOS平台為例，便有專為玩光畫而設的《LightBomber》，此App內置長時間曝光拍攝功能，拍完仲可將影像即時上傳至社交網絡，另內置5種光源模式，就算唔記得帶電筒或LED燈，都可以用手機頂住先。

售價：$8（iOS）

外國達人 上位靠創意

今次玩單車加Light Painting已經創意滿分，原來外國有唔少達人都試過將運動與Light Painting結合，當中光畫大師Patrick Rochon試過將滑水、街舞等融入Light Painting，展現出另類動感一面，有興趣不妨到其網頁瀏覽其作品。

網址：www.patrickrochon.com

撰文：孔慧思　

部分攝影：張錦昌