滘西灣魚排靚灘釣出Summer Fun

提起魚排，好多人都覺得齋釣魚有啲悶，其實近年好多魚排已轉型，甚至提供地方畀人玩Party Games，今次小記同模特兒和攝影師一行幾人去咗滘西灣休閒垂釣樂園，除咗可以喺近3萬平方呎魚排試吓「無鈎釣大魚」外，入場費已包埋快艇接駁附近嘅隱世靚灘滘西灣，可以喺呢度同陽光玩遊戲，好多遊艇船P都特登嚟呢度o架！

無鈎釣懵仔魚

香港唔少魚排嘅位置偏遠，而滘西灣休閒垂釣樂園嘅位置相對有優勢，它位於滘西洲同吊鐘洲之間，距離西貢碼頭只有約20分鐘船程。小記步入魚排，即見到大型水池，仲貼住「無鈎釣大魚」，到底點玩？魚排負責人即時將魚仔魚餌掛喺魚竿前端，一放落水即引來幾十條巨魚搶餌，原來呢啲魚名為「懵仔魚」，閒閒哋都有十斤八斤重。不過由於魚竿冇鈎，巨魚唔會上釣，似餵魚多過釣魚喎！

各式海魚明碼實價

樂園的3萬平方呎地方，足可容納300人咁多，而魚排大部分地方都有帆布遮頭，烈日當空或者落雨都唔怕。講到真正釣魚，其實魚排由石蚌、三刀紅魚到沙巴龍躉等都有，每條明碼實價，釣到的話要磅水先拎得走。老手更可從魚排旁邊嘅大海釣魚，魚排仲有得借齊架生，只係魚餌要自己買啦。不過小記冇乜耐性慢慢等魚上釣，即時轉戰去「隱世靚灘」，皆因入場已經包埋快艇費用。

魚排有近3萬平方呎，喺香港算數一數二。

「無鈎釣大魚」其實係同十斤八斤重嘅懵仔魚玩遊戲。

快艇轉場隱世沙灘

滘西灣沙灘位於魚排對岸，乘快艇一兩分鐘即達，由於這裏無法從陸路前往，加上水清沙幼，所以有好多遊艇都會泊喺附近，再用艇仔載人到沙灘玩。小記閒日下午去到，見至少有10架遊艇在沙灘對出一字排開，船家稱採訪當日已算少人，假期隨時有廿幾架遊艇停泊。去到沙灘，游水嘅游水，堆沙嘅堆沙，仲可以帶埋Party Games去玩。而魚排亦有安排沙灘燒烤、黃昏釣墨魚同魚鮮餐等Options，依家去魚排玩又點會悶呢？