4.7吋F-07E 夢幻怪閃黨

毛毛︰「喂大眼仔，就嚟開學，你今年準備咗啲乜嚇細路？」大眼仔︰「我主修驚嚇學，嚇人道具當然唔少得。手上呢部DoCoMo × Disney別注手機F-07E，不但有我哋嘅Wallpapers，而且由解鎖介面到Widgets都注滿迪士尼元素；加上耳機防塵塞同機背識得狂閃，夜晚閃住出場保證嚇倒佢哋！」毛毛︰「功能咁盞鬼，你似氹細路多過嚇細路喎！」

售價︰$5,480
系統沿用DoCoMo UI介面，提供最多7版首頁。

機背閃爍圖案

Disney產品一向老少咸宜，又點會嚇壞細路呢？今次F-07E為了男女通殺，一改以往花綠綠嘅可愛造型，改走較成熟路線，以純白直板機身配以4.7吋巨芒，外形跟一般Smartphone分別不大，但特別在機面下方加入米奇嘜頭剪影，低調得來凸顯個性。若嫌唔夠搶眼，機背城堡及星塵圖案仲內置多色閃燈，用家可按喜好設定閃爍顏色、速度和次序，當接收來電或短訊等情況便會閃動，猶如主題樂園放煙花咁搶眼。

人氣角色介面

貴為別注手機，Sell款以外，軟件內容同樣迪士尼上身！小記甫開機，化身管理員嘅Tinker Bell小仙子已喺屏幕飛來飛去；再開啟介面設定，更有22款主題Wallpapers任揀，胡迪、史迪仔、唐老鴨、小熊維尼當然唔少得，連毛毛、大眼仔也粉墨登場，粉絲必Like！其他別注元素包括迪士尼鈴聲、米奇時鐘及自拍鏡等，惟可惜主題Apps如《Disney Cinema》及《Disney Games》只限日本使用，香港粉絲得個恨字。

自拍鏡、鏡頭及補光燈一字排開，下方則是指紋識別器。

附送兩款耳機防塵塞，一插入機頂即透出光芒。

送耳機防塵塞

跟一眾怪獸一樣，F-07E外觀搶眼又兼具內涵，系統主要靠1.7GHz四核心處理器及2GB RAM推動，配合指紋解鎖、1,310萬像素鏡頭及日系機必備的IPX5/8防水認證，規格拍得住市面嘅旗艦機王。美中不足係屏幕只有720p質素，若能一舉提升至1,080p，畫質一定靚得多。此機另一賣點是配件豐富，除橫置式充電座外，還附有兩顆半透明耳機防塵塞，不但一插即閃，手機屏幕還會播出專屬米奇或米妮動畫，非常Fantasy！