Desire 600 雙卡「遊」物

雙卡雙待一向係內地山寨機嘅招牌功能，想搵部大廠出品、靚仔兼得體嘅雙卡機，以前確實冇乜選擇。幸好近期各大廠陸續「埋堆」玩雙卡機，好似HTC Desire 600擁有白色型仔機身，仲植入旗艦機HTC One嘅BoomSound靚聲和Sense介面，暑假拎去旅行絕對唔失禮！

售價：$3,298（a）

純白搶眼

過往雙卡機以內地出品為主，設計一式一樣。Desire 600嘅定位明顯走中高檔路線，用上修長機身及幼邊框設計，加上弧形機背，外形充滿日系風格。新機備有黑、白兩色選擇，小記覺得白色較為吸引，皆因其正面植入銀色拉絲邊框，屏幕外圍仲有一條搶眼嘅紅邊，設計有心思。而呢條紅邊不但具有襯托之用，同時植入自家BoomSound雙前置喇叭，支援Beats Audio靚聲，播歌時音效又響又紮實，表現不俗。

清晰易用

除咗賣靚樣，新機嘅雙卡功能亦相當齊備。狀態欄可顯示兩張SIM卡嘅網絡接收狀況，而且內置「雙網絡管理員」，可指定SIM卡名稱，亦可設定優先使用哪張SIM卡，清晰易用。唯一美中不足是只得SIM 1卡槽支援3G上網，SIM 2只能以GSM作語音通話。規格方面，新機搭載Qualcomm Snapdragon 200 1.2GHz四核心處理器和1GB RAM，最重要是預載Android 4.1系統及Sense 5.0介面，不但有齊BlinkFeed動態主頁，一版睇晒新聞、面書等資訊。另備有Video Highlights功能，用家只要揀選心愛相片，手機便會幫你加入配樂和濾鏡，製成30秒Moody短片，擺上網肯定爆Like。