Killer is Dead血腥Cult索女

遊戲風格獨特

以「獻給21世紀大人們的愛與處刑幻想」作宣傳語句的《Killer is Dead》，用上漫畫風格描繪角色，好有Cult版《人中之龍》味道。由於背景設定都幾虛幻，所以毋須深究點解會出現以斬殺罪犯為目的嘅秘密組織，亦唔需要理會男主角Mondo Zappa何以裝上機械臂，總之一切以爽快、刺激官能為主。

最後審判敵人

遊戲強調「反應」，動作速度感甚強，小記試玩時基本上冇時間考慮出乜招，總之就狂撳掣喪劈喪射。男主角右手拎住名為「月光」嘅長刀，會吸收敵人嘅血提升攻擊力；而裝上合金機械臂嘅左手，可以血來驅動並發射子彈，左右手各有不同攻擊風格。不過只得斬擊、開槍、衝刺、迴避等當然未夠喉，當Combo連擊數去到最高時，便可發動「最後審判」，能選擇以暗殺、虐殺、處罰同執行其中一種方法，了結各個目標人物，鍾意血腥嘅機迷一定覺得過癮。

談情強化能力

在硬橋硬馬的戰鬥之外，新作亦有「軟性」一面，就係加入花花公子模式（Gigolo Mode）。主角除了是一個身懷異能的處刑事務專員外，實際上亦風流成性，要同世界各地的蒙德女郎（Mondo Gal）談情，讓女角提供特別道具以完成任務，過程有幾分似《人中之龍》，當中吸血孃Betty更只會在初回特典現身。日文版過幾日（8月1日）就有得玩，到9月1日仲會追加中英日文合版，總之早買早享受啦！

DETAILS

類型：動作

開發：Kadokawa Games、Grasshopper Manufacture

平台：PS3

推出日期：8月1日（日文版）9月1日（中英日文合版）

售價：$388

查詢電話：2341 2356

撰文：布偉倫

部分攝影：陳世昌