Ascend P6 6.18mm 薄趣誘人

賭神朱古力，又薄又脆，係唔少人至愛嘅零食。Huawei新機Ascend P6同樣Sell「薄」、「趣」，機身僅厚6.18mm堪稱全球最薄，並搭載10級美顏拍攝模式等有趣功能。售價僅$3,280，食得過！

兩塊香口膠咁薄

Huawei向來愛薄，早於上年已推出當時全球最薄、僅厚6.68mm的Ascend P1S。不過佢哋仲未滿足，近日再加推Ascend P6，厚度進一步減至6.18mm，相比iPhone 5嘅7.6mm頓時薄咗一截；小記於現場所見，機身Slim到得兩塊香口膠咁薄，難怪可蟬聯全球最薄之名！外形亦一改國產娘味，以全金屬一體成形設計，配合幾乎用盡整個機面的4.7吋In-Cell LCD屏幕，相當有貴氣！顏色暫時只有黑、白兩色，但遲啲有粉紅色版，女士們不妨等一等。

10級美顏效果

Cool魔格言︰「每個女人都是上帝傑作……我會把每個女人當藝術品去欣賞。」估唔到新機理念亦相同，內置美顏拍攝模式，可為女士提供10級美顏效果，由放大眼睛、磨白肌膚到弄尖下巴都可以，方便將每個女人都影到靚一靚。新機還支援500萬像素前置鏡頭及4cm微距拍攝功能，無論自拍定近距離影食物都幫到手！其他拍攝功能包括F2.0大光圈、HDR、全景等，令影相猶如傻瓜機般方便。

內置Emotion UI，程式及Widgets放於首頁，操作更順手。

耳機插口的塞子其實是小針，可用來拮開SIM卡槽。

管理資料工具

Cool魔另一金句：「我雖然靚仔，但唔係傻嘅。」P6亦一樣，樣靚身材正之餘，還搭載自家製Hi-Silicon K3V2四核心處理器，時脈達1.5GHz，在2GB RAM輔助下，撥頁、打機都爽到爆。Emotion UI介面亦值得一讚，棄用傳統App Drawer，將所有程式擺喺面，令操作更直接就手，廠方更提供大量主題介面畀用戶「單撈」，用幾耐都Keep到新鮮感。另外，有見愈來愈多Apps需存取用戶個人資料，它特別植入《Permission Manager》來管理存取權限，令各位用得放心。