Lumia 925鋁神逐格影

女生揀手機，首要睇樣，其次影相功能要好玩。Nokia新機Lumia 925正符合以上條件，一體成形鋁機身備有3色選擇之餘，設有870萬像素F2.0光圈蔡司鏡頭，支援全新Smart Camera功能，可連拍10格影像再合成動感相片，直頭好似DC咁好玩！

Lumia 925

自製動感相片

Nokia近年銳意憑手機拍攝功能闖出名堂，早陣子發表新旗艦機Lumia 1020，鏡頭擁有高達4,100萬像素，比好多相機都要勁。雖然今次Lumia 925冇咁誇張，鏡頭只有870萬像素，但對應F2.0大光圈及PureView技術，於低光環境下能拍出清晰相片。軟件方面則加入Smart Camera功能，一經啟動即可連拍10格影像，之後用家可對相片進行修改，例如透過Best Shot揀選質素最好的一張、把身後的路人甲移除、合成製作出動感相片，用來拍小朋友或運動比賽最適合不過。

設計回歸踏實

以往Lumia手機愛玩顏色，今次Lumia 925回歸踏實，採用黑、白、灰這3款中性顏色，還在聚碳酸酯機身加入鋁金屬材料，耐用得來感覺更Pro。重量則比上代Lumia 920大幅減少46g，而厚度僅8.5mm，配合弧形圓角框邊，手感不俗。雖然其屏幕解像度只有1,280×768，數字上唔算高，但植入出名鮮色的AMOLED面板，加上ClearBlack及Sunlight Readability兩大技術，畫面對比及亮度分外高，在猛烈陽光下依然睇得清楚。

採用《Windows Phone 8》系統，提供Live Tiles方塊主頁。

Lumia 925（上）比上代Lumia 920（下）薄得多，連機頂也變得更流線。

Lumia 925（上）比上代Lumia 920（下）薄得多，連機頂也變得更流線。

8月追加myTV

Nokia一早揚言四核心處理器用處不大，故Lumia 925只用雙核心處理器，幸好時脈達1.5GHz，在1GB RAM輔助下，轉頁、開Apps都好順暢。系統則是《Windows Phone 8》，廠方指目前已支援約145,000個Apps，其他平台的程式日後也會陸續加入，例如8月有《myTV》下載，方便用家睇Sam哥同 Cool魔大鬥法。另外，《HERE》地圖亦經過優化，不但可結合GPS找出附近食肆和景點，還追加了港鐵出口及商場內部地圖，搵路Shopping幫到手。