限量2,000隻！1:6紅魔雙煞

先出現役球員

近年本港Figure界百花齊放，唔再獨沽一味玩電影角色。而ZCWO取得曼聯官方授權的消息傳出後，小記身邊嘅曼聯躉已經話要訂貨，ZCWO主腦Simon表示︰「曼聯毫無疑問係港人最愛嘅球隊，去年我膽粗粗同佢哋洽談版權，起初佢哋反應都幾保守，但審閱過我嘅舊作後，終於憑質素獲得認可授權。現階段會主力出現役球員，傑斯同朗尼係頭炮，動漫節時會再有尹佩斯試辦，之後希望可出埋簡東拿等經典球星！」

頭雕拿捏神髓

「足球，一係入一係唔入。」但玩Figure，入唔入得過就好睇頭雕。今次傑斯同朗尼頭雕出自韓國IMINIME團隊Rovo Jin之手，坦白講神似度尚有改進空間，但傑斯的高顴骨、尖下巴，以及朗尼嘅史力加面相，都拿捏得到；而且兩者的塗裝自然，鬚根、雀斑都顯而易見。唯一要彈是傑斯未見禿頭，朗尼膚色又過分偏黃，若呢啲位能夠細執便更完美。

售價︰$1,480	除了主場紅色球衣外，額外送多一套白色作客球衣。	各有兩對波Boot，朗尼送紅、黃兩色，傑斯則送金、白兩色。惟受版權所限，不能加入商戶Logo。

波衫傳神有Heart

「做前鋒最緊要有力！」做Body一樣要，兩款Figures的素體除了按照球員真實體形而開發，胸毛、紋身跟到足外，其髖關節、膝關節及腳踭加入了橡膠物料，令扭動擺甫士時更有力，玩得耐都唔怕變「軟腳蟹」！另外，素體的心口和波鞋內藏磁石，配合附送的磁石足球配件，便能做出心口控波、凌空抽射等動作。另一傳神位係波衫，它採用2013/14賽季球衣，徽章、人名同號碼字體幾可亂真，並附送波襪、護Pat、兩對波鞋同6對造型手，加埋個仿真草圓形地台，齋係配件已見誠意。

由衫背字型到波襪MUFC字樣都跟足官方設計，可惜英超獅子嘜頭唔落得。	Body按球員體形而開發，提供超過30個關節。留意膝部棄用傳統雙關節，避免外露時穿崩。	6對造型手有齊指天、握拳及手套造型，方便擺出不同甫士。

撰文︰陳志滔

部分攝影︰張錦昌

查詢電話︰2366 2688