激過Wakeboard JetSurf噴射衝浪

歐洲Hand Made

其實JetSurf喺2008年由Martin Sula研發，呢位前F1賽車工程師一向鍾意衝浪，所以諗計將引掣融入滑浪板內。JetSurf喺俄羅斯等地勁Hit，但由於要喺歐洲Hand Made嘅關係，每月只可以生產20塊左右！今次引入香港嘅型號，屬於JetSurf Factory GP100，身長180cm配合流線設計，外形同一般滑浪板差唔多，不過中央位置明顯厚啲，揭開蓋便會見到機件，包括一副17匹引擎及2.5L油缸。難得喺入滿油嘅情況下，JetSurf只重15kg；原來成塊板均以碳纖和避彈衣物料KEVLAR打造，難怪硬淨得嚟又輕身。

一禁畀油易控制

講到JetSurf咁高科技，原來玩上手並唔太難，今次搵嚟將佢引入香港嘅JetSurf達人周智勛（Frankie）教大家點玩。「首先要留意基本操控，JetSurf要郁主要靠板頭嘅手把，禁落去可畀油加，相反鬆手即可減速。而手把旁邊嘅特製磁石針都好重要，用法同車匙一樣，將磁石針拮落手把，引擎便會喺5秒內起動，玩家要趁住起動初期，由瞓身姿勢變成半跪，之後取得平衡後便可站立。」

JetSurf身長180cm，一般香港常見嘅遊艇絕對放得落；外國人好興將JetSurf放喺車尾箱，揸去海灘直接拎出嚟玩。 售價：$110,000起 查詢電話：9518 9339	落水前記住要着救生衣，切勿戴任何配飾。	設有4個軟墊Pad，用作固定左右腳位置。

眼見Frankie由落水到起水，全程唔使10秒，梗係要問佢竅門所在。他表示：「趴上板時，記住心口位置一定要保持喺板嘅中央，初學者可趁機試吓畀油嘅感覺。其實有Wakeboard底子會好易上手，皆因兩者嘅平衡技巧差唔多。若然想轉彎的話，只要將身體重心傾側，畀多少少油便可穩定過彎。就算玩玩吓失平衡都唔怕，因為磁石針一旦與手把分離，引擎便會立即熄掉，相當安全。」

底部連螺旋槳都以碳纖物料打造，而Fin比較長和大。	前方設有手把，加速、減速靠晒佢。	2.5L油缸以全速飛馳可玩到1.5小時，通常都係約10分鐘一Round同朋友輪住玩。

55km/h海上飆

「比起Wakeboard，其實玩JetSurf嘅感覺仲Free啲，因為Wakeboard要靠快艇拖行，尾浪夠唔夠實仲要睇架快艇質素。而JetSurf既可以就咁喺海上兜風，又可揸住佢追浪，風浪唔大嘅香港一樣啱玩。」Frankie補充：「最正係JetSurf畀盡油可以去到55km/h，嗰種水上飛馳嘅感覺勁爽！鍾意嘅話又可以玩花式，外國唔少高手已經玩到打觔斗、跳到幾層樓咁高！」

達人Frankie示範 落水後可以將磁石針拮入手把，Engine 便會於5秒內起動。	拿拿聲用心口趴上板中央，穩定後可以用膝頭跪上去。	成功起水！以雙腳及上身保持平衡，手腕繫穩手把方便加減速。

老外玩花式

JetSurf喺外國興起，自然有唔少高手。有興趣的話不妨瀏覽JetSurf官網，會見到大量相片和影片，佢哋仲不時喺度Show Off高難度花式，勁型！

網址：www.jet-surf.com

考牌先玩到

雖然JetSurf屬新興玩意，但Frankie提醒大家，喺香港玩之前一定要考牌：「玩家要有一個俗稱船主及大偈牌嘅『遊樂船隻操作人二級證明書』。而買JetSurf嘅手續同買遊艇差唔多，如要有第三保等。」

撰文：林子聰

攝影：梁偉德

模特兒：Kinki（Pure Models）