爆Data自救攻略 港鐵Free玩 Wi-Fi

開通84個站

以前想喺港鐵免費上網，最直接的方法是到iCentre服務站，但由於它只覆蓋14個站，用途不大！上周港鐵終於喺全線84個車站大堂（不包括輕鐵）提供免費Wi-Fi服務，只要搵到橙色嘅「免費Wi-Fi熱點」Banner，便可接駁上網。

小記於旺角站進行實測，由於每節上網時限為15分鐘，一天最多可接駁5次，即總使用時間達75分鐘。其實旺角很多地方有同類服務，如鄰近港鐵站的商場、旺角電腦中心、政府設施的「WiFi通」等都提供免費上網。還可進入麥當勞等餐廳限時使用Free Wi-Fi，出街就唔怕「爆Data」啦！

放大圖片	企喺港鐵的Wi-Fi發射器附近，接收力會較佳。

實測！速度夠睇高清片

究竟港鐵的Wi-Fi速度有幾快？小記於平日12:30pm~1:00pm於旺角站以《OFCA》App測試，結果顯示最高上下載速度分別達7.61Mbps及9.63Mbps，雖然比用4G網絡近30Mbps差少少，但已能滿足上網、下載Apps等需要，經YouTube睇高清片仲絲毫唔窒。

不少旺區商場及餐廳，均提供每天限時免費Wi-Fi服務。	試播《悍戰太平洋》高清Trailer，畫面流暢唔窒，足見免費Wi-Fi都夠睇片。	於旺角港鐵站以《OFCA》測速，Free Wi-Fi下載速度達9.63Mbps。

惟要留意，目前港鐵站內的無線熱點數目仍然偏低，例如旺角站大堂便只見一個Banner，而且選址在較少人流的A、B出口，反之「等人位」如銀行中心等完全收不到Free Wi-Fi；最弔詭是行多兩步網絡會中斷，再上網又當新一次接駁計算。此外，其下載速度極受人流影響，例如小記在相同位置的8:00pm再測試，發現下載速度大幅降至2Mbps以下，證明網絡於繁忙時間不敷應用，期望能作出改善。

接通港鐵Free Wi-Fi Step 1 在港鐵站「免費Wi-Fi熱點」Banner附近，可找到「MTR Free Wi-Fi」網絡。	Step 2 以Wi-Fi連接後，於使用條款下按「同意及連接」。	Step 3 成功連接後，每次使用時限為15分鐘，有埋時計提醒大家。
盧惠光

上網貼士：避免處理個人資料

使用免費Wi-Fi固然方便，但同時衍生出網絡保安問題。防毒軟件公司Version 2產品及服務高級經理盧惠光（Kenneth）表示︰「由於公眾Wi-Fi沒有為傳輸內容加密，黑客利用簡單工具便能盜取同一網絡下的資料，因此在這些地方上網，應盡量避免處理個人資料如網上交易等。另外，手機應安裝防毒軟件並時刻更新，以及開啟Firewall阻截外來侵襲。」

撰文︰陳志滔

攝影︰陳富權