近期興起「巨人」熱潮，但Wii U新遊戲《Pikmin 3》卻反其道而行，玩家要控制Pikmin小小外星人，以蟻多嬲死象方法擊倒巨大敵人。機齡長嘅玩家可能有玩過9年前嘅上集，當時喺GameCube推出，
到今集搬到Wii U平台，除了加入體感式操控，仲新增特異功能Pikmin，難怪早前喺美國E3電玩展的任天堂攤位，大受玩家歡迎！
《Pikmin》粉絲應該等到頸都長，皆因由2004年第2集面世後就冇出過續集，要到Wii U平台才見這款由宮本茂主理嘅名作。其實幾集故事設定都好相似，講主角控制一大班Pikmin外星人，消除敵人及蒐集水果充飢。玩家要善用每個Pikmin嘅特長去解決難題，勁考腦筋。當然啦，事隔9年，除遊戲畫面變成高清之外，亦將背景改為好有景深嘅立體設計，更可利用地形特點佔上優勢。
新作增加主角和Pikmin種類係理所當然嘅事，今集主角包括Alph、Brittany同隊長Charlie；玩家可隨時從3個角色中切換，分工合作解決難題。但識得轉換主角唔係重點，最緊要係要用細細粒嘅Pikmin幫手。紅、黃同藍Pikmin係原來在遊戲出現的品種，分別能以火攻擊敵人、可跳至高處，以及在水中發揮技能。《Pikmin 3》再增加外形似岩石的Rock Pikmin同有飛翼的Winged Pikmin，前者可以撞穿牆壁及對付有硬殼的敵人；後者則可避過迂迴路線飛向高處。在兩種新Pikmin登場下，令玩法更具變化。
實際操作方面，以Wiimote加Nunchuk為例，只要按B掣即可召集Pikmin，將Wiimote指向畫面再按A掣的話，便可將它們引領到特定位置。而按C掣則可選擇Pikmin種類，再㩒Z掣鎖定敵人同目標，可率領整支兵團向Boss進擊，操控方法同早年興起的RTS（Real Time Strategy）即時策略遊戲相似。只要在限時內完成任務，夠一定數目的Pikmin便可挑戰下一個敵人。今年E3電玩展，任天堂提供咗「Tropical Forest」同「Thirsty Desert」兩個版圖供試玩，前一關主要試用Rock Pikmin，後一關則可操控Winged Pikmin，仲可以雙人合作過關添！
類型：策略模擬
開發：Nintendo
平台：Wii U
推出日期：7月13日
售價：約$450
查詢電話：2359 7998
撰文：布偉倫