DC「夏」水禮濕身有法

夏天不但為大地帶來美腿，去旅行、逛沙灘仲有機會遇上Bikini美女，唔想錯過一幕又一幕動人心弦的畫面，當然要帶埋防水DC出擊。可是很多人忽略了這類DC的正確使用方法，搞到機身入晒水。

相機報銷事小，冇晒靚相事大。今次便教大家防水DC嘅濕身貼士，諗住暑假親近陽光與海灘嘅你又點可以錯過。

拆解常見謬誤

唔少人去沙灘Happy完，都好心急過相擺上網，結果一打開DC卡槽或電池匣，水滴和濕氣就入晒機身，嚴重者有機會使零件短路，一滴水足以同部相機講Bye Bye。另外，有人拎部機上水後，以風筒吹乾機身，這樣做會間接降低相機的防水能力，要知道防水機能夠防水，主要透過接合位的防水軟膠保護，可是軟膠物料被熱風吹過後，容易變形或硬化，失去原有的彈性及防水能力。風筒，留番嚟吹頭啦！

放大圖片	用清水沖洗機身表面的沙粒和塵埃，再浸泡一會去除鹽分。

落水前後要注意

咁應該點樣使用防水相機呢？專業攝影師Felix So表示：「無論使用防水相機或防水殼，如想知道自己部機Work唔Work，在檢查電池匣和卡槽閂好後，不妨在屋企浴缸先試清楚有冇入水，減少出事機會。」至於上水後，千祈唔好嘗試立即打開機身，首先應以清水沖洗沙粒，再用清水浸泡一會，以分解海水中的鹽分，然後拿防掉毛的抹布，拭乾機身表面並擺放在陰涼處風乾，咁就萬無一失。

清洗機身後以防掉毛抹布拭乾機身，並放至陰涼處風乾。

切忌以風筒吹乾機身，過熱會加速膠邊老化，降低防水能力。

防水套與即用即棄相機

如果一年只去一兩次沙灘，動輒花二三千元買部防水DC似乎不太划算。其實市面還有另類防水攝影選擇，較常見是購買第三廠商的防水套，以韓國DiCAPac出品為例，視乎大小及相機類型，售價由百多元起，一般可深潛至5~10米左右。但由於其Size不是為指定相機度身訂造，袋身的虛位會令操控較困難之餘，亦容易形成霧氣。另一類是即用即棄傻瓜機，如Fujifilm的QuickSnap Marine支援10米防水，約可拍攝27張菲林相片，影完拎去沖曬就搞掂，但它採用定焦設計又沒有拍攝模式選擇，可謂有辣有唔辣。