揚帆「曬」貴氣
香港地潮濕到暈，夏天城市內猶如蒸籠一樣，梗係想約埋三五知己出海遊船河，感受乘風破浪帶來的快感。可是去親遊船河總離不開「到會＋滑浪＋香蕉船」這方程式，而且樣樣都限時限刻，冇新意兼唔夠喉！若閣下都有同感，不如報讀帆船入門課程，$3,900考完牌後便可揚帆出海，目的地、速度同時間均由自己話事，最重要係貴氣過人，靚女見到肯定立刻上船！
揸船平過學車
帆船運動早年由外國引入，看似有錢人玩意，但其實一點也不貴。以學費為例，由香港双體船會（CATA）舉辦的ASA101大型帆船入門課程，學費只需$3,900，隨時比學車便宜。在為期21小時的課程裏，學員會從較容易控制的單體帆船開始，了解船身結構、電子儀器、航海術語及規則等；完成課程再通過1小時筆試，便會獲得ASA國際認可證明，可正式租船出海。
冇油味零噪音
為了解更多，今次找來帆船達人Cramond Wong（黃燿祥）一同出海。由香港仔遊艇會乘快艇駛近，離遠已看到試坐的Beneteau First 21.7法國單體帆船鶴立雞群，十多米的主帆在微風下飄揚，沒有半點噪音及電油味，感覺與遊艇截然不同。Cramond指出，帆船設有甲板，有些巨型款式更設有大網床，成班Friend躺着邊吹海風邊喝紅酒，悠然自得！
學升帆練平衡
叫得帆船，動力當然來自帆，但原來操作絕不容易。Cramond教路，起帆時要先把繩索綑住絞索器，一隻手拉，一隻手絞，直至適當位置才綁緊；若中途不夠力，可裝上絞桿輔助攪動。升好主帆後，船便有了動力，但這時食風會較為厲害，令船身不時搖晃，「我以前搭船去澳門都會嘔，但學咗帆船後，由於不時要在船上走來走去操作儀器，無形中體能及平衡力都提升了。但建議大家出發前最好食定暈浪丸，否則暈船浪就好掃興。」
首要看風駛舵
有了動力，接着便要「看風駛舵」，即透過控制主帆索的鬆緊來控制食風位置，從而調校航行方向。另外亦要適時改變食風面積，例如順風時盡量開帆，以增加速度；逆風時則要將帆向內收緊成45度，再以Z形路線前進。「玩帆船易學難精，一定冇揸遊艇咁舒服，但可訓練耐性同團隊合作，對個人修養亦有幫助。」他教路，開船前最好預定目的地及到達時間，既可訓練技術，到達後又能帶來莫大滿足感，一舉兩得。
另類玩法
唔想自己揸船？香港双體船會亦有舉辦各式觀光團，由維港遊、南區遊到地質公園全面賞都有，包船價由$1,390起。
地質公園全面賞
時間︰約7小時
人數︰最少10位，最多30位
途經地點︰海蝕洞、萬宜東壩、糧船灣
個人價︰$395起（星期六、日）
包船價︰$3,990（平日）$5,990（假日）
查詢電話︰2511 9398
帆船種類
帆船大致可分為大型帆船（Keelboat）及小型帆船（Dinghy）兩種。前者船底設有灌鉛，平衡度較高；後者則要靠船員的體重來平衡以防止翻船，較講技巧及合作性。今次拍攝的Beneteau First 21.7屬於前者，長6.4米，可載3人及1名船員。至於價錢，Cramond表示帆船豐儉由人，貴的數以百萬元，平的十數萬元便有交易，而且碼頭租泊、會費連清潔費每年合共數萬元，一般人都玩得起！
撰文︰陳志滔
攝影︰林資凱
模特兒︰Yankit Chan