6.1吋 Ascend Mate 旅行長氣袋

暑假去旅行，有甚麼是必帶之物？唔少人會答「手機」，由漫遊上網、影相玩Apps、規劃行程到面書打卡都要靠佢，好多時玩唔夠半日就冇電。Huawei新機Ascend Mate就冇以上難題，皆因它內置4,050mAh容量電池，比一般Smartphone多近一倍，小記拎住佢玩足兩天都仲有電剩，勁長氣！加上屏幕有6.1吋咁大，成班Friend圍埋睇相都一清二楚，旅行記得帶埋佢！

6.1吋 Ascend Mate 售價︰$3,680<br>預載Emotion UI介面，將Apps放在首頁，操作更直接。

6.1吋 Ascend Mate 售價︰$3,680
預載Emotion UI介面，將Apps放在首頁，操作更直接。

IPS+巨芒設計

近年興起Phablet一詞，即是Phone加Tablet混合體，就算手機個芒出到六七吋咁大，市場反應一樣咁好。Huawei就睇中呢點，將Ascend Mate嘅屏幕放大至6.1吋，比起對手Note II還要大0.6吋，雖然拎上手真係好鬼大部，但視野的確廣闊好多。最重要是它採用IPS+面板，顏色豐富之餘可視角度更高，睇相時連隔籬個Friend都照顧埋，就算解像度沒有全高清質素，也值得原諒。

電池夠用兩天

屏幕咁大，耗電量咪好誇張？呢方面廠商幫各位諗埋，機內加入4,050mAh巨無霸電池，待機時間長達27天，狂煲電話都能撐到23小時之久。小記連日實測按照平時打機、上網、傾電話，結果發現兩天後竟然剩餘32%電量，相當誇張，以後去旅行可以將「尿袋」放埋一邊！不過有辣有唔辣，手機採用一體成形設計，雖可令表面光滑無縫，但冇得拆殼換電，將來電池「打柴」便較為麻煩。

6.1吋大芒機身，厚度只有9.9mm，拍埋兩毫子就知佢幾薄！

鏡頭僅得800萬像素，幸好旁邊備有LED補光燈。

追加單手操作

巨芒靚絕，估唔到內涵都唔差，大腦是自家製Hi-Silicon K3V2處理器，提供四核心1.5GHz速度，配合1GB記憶體播放1,080p高清片，依然絲毫唔窒。介面更值得一讚，把Android公版改為Emotion UI介面，既取消了作用不大的App Drawer，還加入「單手操作」及「懸浮按鈕」功能，前者可把鍵盤縮細移位，方便單手打字；後者則將計數機等常用功能整合為一，女士們外遊血拼後，計數時毋須左搵右搵，功德無量！