洛杉磯E3直擊 Battlefield 4 64人殺戮戰場

今年洛杉磯E3電玩展被Xbox One及PS4搶盡風頭，不過唔好以為兩間主機廠身處嘅West Hall才人頭湧湧，有多間遊戲大廠擺檔嘅South Hall人潮仲誇張，每隻勁Game都大排長龍。而講到最具人氣一定要數《Battlefield 4》，場內擺咗64台試玩機供32 Vs 32對戰，配合迷幻燈光效果，好有兩軍戰場對壘嘅感覺！

《Battlefield 4》指揮官試玩台設於高處，好有統領萬軍氣勢。

Siege of Shanghai擂台試玩

EA攤位可說是今年遊戲開發商中最大之一，離遠已望到大大個《Battlefield 4》擂台，擺咗64部機畀玩家打其中一幕「Siege of Shanghai」，淨係講場面已先贏一仗！《Battlefield 4》亦喺Xbox展前發布會示範咗「Angry Sea」單人模式，喺Frostbrite 3遊戲引擎輔助下，被擊中嘅航空母艦會見到戰機東歪西倒、海水四方八面湧入，場面靚得誇張。新作另加入Levolution機制，令每場戰役都有唔同變化，並再次導入指揮官模式，玩家可以好似置身戰情室般指揮各部隊；而E3現場更設有指揮官試玩台，多個大芒顯示不同資訊，居高臨下勁有氣勢。此外，同廠還有新作《Need for Speed: Rivals》供試玩，可選擇加入非法賽車或警方陣營。

Call of Duty: Ghosts水底激戰

Activision嘅新王牌毫無疑問係《Call of Duty: Ghosts》，今集加入水底戰，新鮮感爆燈，人氣可說跟《Battlefield 4》半斤八両。於早前Xbox One發布會上，開發商已表明會將新作移植至次世代平台，今次E3終於可以親身睇遊戲示範。今集加入嘅水底潛行動作，像真度極高，仲有好多海洋生物伴玩家左右。而角色外形、服裝材質及場景細節等都有顯著提升，還加入有趣設計如可自訂角色外觀，以及可帶同軍犬出戰，但次世代機種版目前還未有正式推出日期。

現場有得試玩《Need for Speed: Rivals》，可選擇駕駛警車或賊車。推出日期：11月19日（平台：Xbox 360、PS3、PC）

現場有得試玩《Need for Speed: Rivals》，可選擇駕駛警車或賊車。推出日期：11月19日（平台：Xbox 360、PS3、PC）

放大圖片

排長龍扮刺客黑客

另一大廠Ubisoft除了有《Assassin's Creed IV: Black Flag》壓陣外，今年仲有隻備受關注嘅《Watch Dogs》，令這兩隻閉門示範嘅大作排晒長龍。前者嘅試玩部分，背景為18世紀加勒比海島嶼，除了景觀同前幾集好唔同外，主角刺客仲可以喺熱帶叢林以「隱形」方式刺殺目標人物。