LUMIX GF6 180度反斗女友

日圓跌破八算，相信唔少人都籌備緊暑假遊日本，咁就一定要帶埋新「女友」去啦，所講嘅係Panasonic「女友6號」LUMIX GF6，既保留無反相機的纖巧身段，又新增Wi-Fi和NFC無線技術，最吸引是首度加入180度Flip芒設計，方便用家輕鬆自拍。日本方面更搵綾瀨遙做代言人，大家唔好淨係掛住新「女友」，而忽略身邊嗰位真女友呀！

售價：$6,890（連14~42mm X單鏡套裝）<br>$7,390（連14~42mm及45~150mm雙鏡套裝）

售價：$6,890（連14~42mm X單鏡套裝）
$7,390（連14~42mm及45~150mm雙鏡套裝）

Wi-Fi及NFC功能

去日本除了Shopping之外，有不少人會周圍影相，仲會將第一手旅行相片擺上社交網站Show Off。為此GF6也迎合潮流加入Wi-Fi無線傳相功能，同時配備NFC技術，只要將對應的智能裝置拍一拍機側即可連線，減省不少繁複設定步驟；用家還可利用智能裝置的《Panasonic Image App》，進行遙距操控、瀏覽相片及分享影像，更能為相片加入GPS定位資訊，去過邊、影過乜都一清二楚。新機的Wi-Fi不但能夠配對手機或平板等流動裝置，甚至可透過網絡傳送相片至電腦備份，又或者接駁電視觀看影像，用途非常廣泛。

篤芒自拍方便

備有黑、白、紅和啡4色機身的GF6，的骰外形明顯針對女士設計，廠方亦明白女士們喜歡自拍，特別引入二段關節的翻揭式屏幕，不但能向上翻180度玩自拍，亦可向下翻45度應付高角度拍攝，加上3吋屏幕備有輕觸式設計，能夠像手機般篤芒揀設定和拍照。當使用180度翻芒自拍時，相機仲識得自動倒數3秒，等用家有足夠時間擺甫士。若細心留意機身的話，還會發現快門掣外圍增設變焦桿，除了支援左右揀選設定外，當使用新款電動鏡頭時，便可如DC般Zoom近Zoom遠，操控更勝從前。

放大圖片	翻揭式屏幕備有二段關節，可上下作180度及45度翻動。

新功能添玩味

雖然新機個樣同上代冇乜大分別，但引入多種功能提升玩味。首先將濾鏡加至19種，新增漂白、陽光等效果，連一掃全景模式都可玩埋濾鏡。另加入停格動畫功能，可把多張相片自動串連成動畫，還可調校播放速度，做出如TimeLapse般縮時影像，適用於捕捉日出日落等場景變化。講到尾，GF6能夠咁好玩，有賴1,600萬像素Live MOS和全新Venus影像處理器，感光度更延伸至ISO 25,600，就算手持夜拍東京鐵塔等景點都冇難度，以後去旅行連腳架都唔使帶，用家自然能夠享受輕鬆旅程。