7年前，資深公關朋友說：「你睇吓，『褲褲』係咁走下坡，唱歌愈嚟愈唔掂，拍戲又未算好得，大家對佢都冇乜興趣，全靠嗰個內地Model『袋袋』同佢搞吓緋聞，先至有得做頭條。」
7年後，「褲褲」已沒有推出新歌，但單靠舊歌已夠做演唱會，拍戲亦拍出成績。「袋袋」則由國產阿模升價N倍，成為名利雙收的名模兼演員。既各取所需，大家都雙贏，便不枉此行，縱使分手了，誰也不欠誰。
請勿誤會，我無意說兩人關係是建基於互相利用，只不過結果真的是互相得益，證明兩人很「登對」，能夠為對方添加人氣和財氣。當然，他倆有幾相親相愛，就只有他們心知肚明。作為一個頭腦非常一般的娛樂版讀者，一邊看到年齡早已不再是處男偶像的男方，多年來一直不肯正面承認女方的正印地位，另一邊看到被全港認定是巨星伴侶的女方，好像由始至終在做唱不出雙簧的One Man Show，不用花腦筋，只須少少Common Sense，也知道一方是有所保留，另一方則過度用力。橫看豎看，都不似一對金童玉女，更不見得會開花結果。
經營感情本身已經夠難，經營一段涉及很多利益的感情關係更加困難。當初相戀時，究竟真的喜歡他/她，或只是喜歡所帶來的繽紛璀璨？日後分手了，究竟是不捨得他/她，還是不忿於將會損失的種種好處？生活太複雜，情感也含雜質。
網址：www.chan-wai.com