遊戲玩家向來好誠實，去年《Ninja Gaiden 3》被評為太「乾淨」，冇咗好多爆血場面，加上考反應、鬥撳掣嘅QTE系統，令到評語和銷量都好一般。來到加強版《Ninja Gaiden 3: Razor's Edge》，開發商終於走番「傳統」暴力美學路線，主角龍隼仲聯同3大索女綾音、霞同紅葉出擊，兼且忍法同武器統統升級，應可吸引粉絲回巢！
心水清嘅玩家可能會發現，《Ninja Gaiden 3: Razor's Edge》唔係早前Wii U嘅首發遊戲咩？事實係Wii U推出至今銷情未算突出，所以廠方反應好快地將遊戲移植到PS3同Xbox 360。雖然Wii U獨有嘅GamePad操控就冇咗，但喺Xbox 360版內，玩家可玩到SmartGlass，能夠喺智能手機或平板睇遊戲成績同戰鬥技巧，甚至可以喺「秘傳」項目入面，瀏覽其他玩家嘅過關心得，都算注入咗啲新意！至於PS3同Xbox 360版嘅畫面，當然唔會比Wii U遜色，動作爽快流暢，噴血效果仲好鬼吸引！
上集改玩新意思，不過機迷唔多受落，今集開發商重新將斷肢爆血嘅暴力場面重現，而且每個角色可用嘅招式更多。先講角色，除咗原有主角龍隼外，今集仲有3位人氣索女登場，包括紅葉同埋原屬《Dead or Alive》系列嘅霞同綾音，個個都衣着性感，而且可能出於設計師嘅偏好，女角嘅能力相當強，以較多人喜愛的霞為例，可以使出型到震嘅「裂風迅風殺」招式，以及高速閃開突襲嘅「櫻惑」奧義，動作瀟灑。
不過龍隼都唔弱得晒，今集當武器「無想新月棍」等級升到最高時，棍嘅兩端會加入鏈球增加連擊數目，做到更多Combo Hit，絕對唔講得笑。
另一方面，敵人嘅A.I.都強咗，冇上集咁易打，要適時使出必殺技方可突圍。上集加入限時輸入指令嘅QTE場面，但到今集嘅出現頻率低咗好多，因為普遍玩家都嫌QTE有啲煩。新作最大變動係導入成長系統，靠賺取Karma值去升級忍法同武器，甚至連奧義同服飾都有得升級，一經強化後，仲可以帶落下一版使用。當然，唔少得係改良埋多人模式，龍隼同綾音2人合作模式「Ninja Trials」，便將關數加到100關，難度仲提升咗唔少。至於可以揀兩款主武器對戰嘅「Clan Battle」就收錄咗5個場景，最多仲可供8人對戰。
撰文：布偉倫