Parkour小子 一躍成名
廿歲出頭時各位做緊乜？讀書、打機還是識女仔？眼前三位小伙子雖然貌似「宅男」，但細細個已經跳樓梯、飛花槽，多年來練得一身Parkour（港譯：飛躍道）絕技。早前有感香港缺乏練習場地，膽粗粗報名《決戰一分鐘》希望贏取獎金圓夢，最後憑空翻等絕技，「踩爆」錄影廠連過8關，奪得遊戲播映以來最多的$250,000獎金！一戰成名，不但Hit爆全城，主意多多的他們還計劃考Cert開訓練班，實行把Parkour由地下帶到地上！
電影啟蒙 挑戰自己
睇電影不時見到外國Parkour高手飛簷走壁，隊長阿Tim坦言是受《因乜差事跳跳跳》啟蒙。「我自小已經跳跳紮冇時停，但籃球、足球太大路唔啱我。直至睇咗呢套戲，先知世界原來有一種咁有型嘅運動。後來我試做動作，自覺唔滿意，便報名參加香港飛躍道協會HKPA的訓練班。玩吓玩吓就認識阿宗同Soames等成員，之後一有空就一齊練習。」
這種「跳躍攀爬」新運動，旁人看難免投以奇異目光，但懂得欣賞的人卻樂在其中，Soames表示︰「例如一條欄杆，其他人睇到會運路行，但我哋會諗點樣跳過去。若諗嘅方法唔得，我哋會不斷練習，直至做到為止。所以Parkour其實係一種克服恐懼，又同時認識自己嘅運動。」他補充，玩Parkour首要提升肌肉力量及四肢協調性，怪不得他們年紀輕輕便成身肌肉啦！
不斷訓練 最忌Show Off
睇YouTube短片，經常看到Parkour表演者做出高難度動作，由一個天台「飛」過另一個天台，但亦因為這些動作，這運動經常與「危險」、「玩命」等詞語畫上等號。阿Tim強調︰「所謂台上一分鐘，台下十年功，你睇網上啲人玩得咁勁，其實人哋已練咗好多年，計過度過先做到出嚟。我哋其中一個創會會員係體育老師，所以每一個動作都符合運動科學，而且每當法國Parkour組織來港時，我哋都會趁機交流並把動作改良，所以絕對唔係亂咁跳。」
玩得Parkour難免有Show Off心態，三人異口同聲指這最要不得，因為若純為表演而未準備好的話，一些簡單動作也有機會導致受傷，更遑論高難度動作。「父母開頭都好擔心，又怕我哋學壞又怕我哋受傷，但見我哋每次玩完都完好無缺，時至今日先放心。」不過阿宗指，玩了這麼多年輕傷在所難免，手腳擦損是小意思，Soames曾因跳公園膠滑梯，失足下一腳踩穿膠板而血流披腳，因此他們才急需訓練場地。
上台比賽 拎走巨獎
「香港冇呢方面嘅訓練場地，戶外練習始終有一定危險性，咁啱嗰時見到《決戰一分鐘》招募參賽者，我就膽粗粗報名。監製見我有咁嘅願望，就提議不如叫埋成Team人上嚟玩！」阿Tim表示，為了比賽他們每日用了接近12小時練習，並按每人強項分配遊戲，例如平衡力較好嘅阿宗玩「科學怪人」等，如此有策略才可連過8關！
觀眾還將這集節目的網上點擊率推至最高，連帶網友也在討論區為他們打氣，群起洗版開咗廿幾版討論，一夜間比不少明星更具人氣。然而他們沒有得意忘形，阿Tim說︰「海綿箱、軟墊、軟壁、木箱、鋼架、彈床同其他保護設備都係錢，一個月連租場費起碼萬多元，所以$250,000獎金只夠營運年幾左右，唯一方法是增加固定收入。」
籌辦活動 訓練藝人
他表示，協會定期舉辦訓練班，又會跟其他商業機構合作，合辦Live Show以增加收入，例如去年電視台慶，他們獲邀去訓練一班藝人玩Parkour。而接下來的4月尾，阿宗及Soames更會遠赴上海修讀Art du Deplacement And Parkour Teaching（A.D.A.P.T.）教練課程，向教練之路進發，「始終要有正規訓練，一項運動才能普及，而多人玩就自然有勁人出現，間接令更多人認識這運動！」
動作示範
越戰法國士兵用於訓練越野行軍的Parkour，講求身、心、技三方協調，特點是沒有任何輔助工具下飛越障礙物，一於請Parkour三子示範。提醒各位，他們經過長時間專業訓練，一般人切忌模仿！
專家教路︰循序漸進
香港浸會大學體育學系副教授雷雄德表示︰「適當的跳躍對孩子成長有很大幫助，但大前提是安全，因為Parkour稍一失手便會帶來不堪設想的後果。若佢哋有心成立訓練場，建議要有初級、中級及高級3種不同設施，以便學員循序漸進地學習。另外，可定期舉辦地區性訓練，或者與學校合辦課外活動，令家長及教師們改變對Parkour的負面印象，盡量洗底自然有更多人參與！」
外國上位例子
外國不乏因玩Parkour而「躍」上大銀幕的表表者，如法國David Belle不但是這運動的創始人之一，還憑靈活身手成為炙手可熱的動作影星，代表作有《波斯王子》等。
撰文︰陳志滔
攝影︰郭凱敏
（部分相片由受訪者提供）