《BioShock Infinite》未出已經拎咗好多外國遊戲大獎，另類風格加上不斷求變嘅精神可說是成功主因，好似新作棄用上集《BioShock》水底困獸鬥玩法，變成喺天空城市拯救超能力少女，仲可以用天際輸送裝置逃走，風格別樹一幟。無論故事、動作以至刺激感都屬一流水準，就算呢隻遊戲遲咗半年推出都絕對值得等！
以前《BioShock》要匿埋喺水底幽暗場景作戰，但到《BioShock Infinite》便作出180度轉變，將場景變成1912年哥倫比亞天空之城。任務最初由前探員Booker闖入天空之城拯救被囚禁嘅神秘少女Elizabeth，雖然話就話拯救，但實情Elizabeth好幫到手，皆因佢識得「時空裂隙」超能力，可以喺另一時空取子彈、武器，以及拎恢復超能力嘅鹽。多咗個女主角，遊戲當然冇咁齋，細心的話還可留意到索女其實係以俄國著名Coser「Anna Ormeli Moleva」作藍本，造型十足真人一樣！
唔止Elizabeth有超能力，男主角Booker都一樣有，而且比上集玩得更多，例如可Hack入裝置將敵對機械人變成盟友，或者可召喚烏鴉來殺人，連雙手出埋火球都得，唯一缺點係Booker需要賺錢，在自動販賣機購買補充體力與精神力嘅回復藥。當然，玩家亦可於關卡內獲得各種強化能力嘅裝備，亦有提升護盾、超能力嘅強化藥劑，不過有時需要Elizabeth協助先攞得到。
天空之城外表睇嚟好風光，實則內藏好多黑暗面，反派角色設定亦相當富心思，好似想捉女主角返去嘅「機動愛國者」，係以美國總統華盛頓為造型嘅機械人，當佢受重創後會露出金屬骷髏真身；另外一直看管住Elizabeth嘅巨型生物Songbird，亦會不斷追住主角嚟打！而今集最特別係天空之城架設咗天際輸送裝置（Sky-Line），玩家只要用天鈎便可勾住扣環，在浮動區域上高速滑行，方便迅速轉移地點外，更可居高臨下對地面敵人做出致命一擊，速度感之強好多頂級遊戲都做唔到。
類型：射擊
開發：Irrational Games、2K Games
平台：PS3、Xbox 360、PC
售價：$428（普通版）、$599（特典版）
查詢電話：2528 0830
撰文：布偉倫