UltraPixel鏡頭 HTC One超吸光

近年手機廠商一味鬥鏡頭像素，但說實話只係數字遊戲，始終成像質素及用戶體驗先係王道。新HTC One就話畀大家聽手機有另一玩法，其全新UltraPixel超像素鏡頭像素雖少，但卻比同級手機吸多3倍光線；配合自家Zoe拍攝模式，低光下相片質素高之餘，仲可以大玩劇場化短片等不同效果。新機4月底推出，拍友們係時候儲定錢！

採用一體成型設計，喇叭放於兩側，讓聲音更出。

強感光玩法多

新HTC One鏡頭像素只有400萬，拍埋一眾千萬像素鏡頭側邊的確冇得比，但佢唔係鬥數字，改用背後的UltraPixel技術來提升成像。顧名思義，它擁有比一般手機更大的感光元素像素點，吸光力高出300%，在f2.0大光圈幫助下，於低光線也能拍出清晰影像。拍攝時更可揀選Zoe模式，預先拍下3秒影像，之後再把影像合併起來或重新揀選表情，嫌唔夠Funny，還可加入相片，製作出具氣氛的劇場化短片，玩法爆趣！

手感佳全高清

講到設計，HTC多年來都鍾情一體成形機身，新機亦唔例外，而且今次難度更高，每個金屬外殼都要花150分鐘製作，並以黏合方式把各部件化零為整，用戶不會在機身找到一絲空隙或一口螺絲；加上廠商特意加入微彎機背，摸上手極為貼服順滑。屏幕方面，雖然只有4.7吋大，不及時下Phablet咁誇張，但解像度及像素密度就分別提升上1,080p及468ppi，後者為目前最高，難怪拍埋iPhone 5身邊，細緻度能勝一籌。

在一體成形設計下，要用針先篤得開microSIM卡槽，較為麻煩！

數字上One（右）比iPhone 5（左）厚1.7mm，但前者機背微彎，更合手形。

數字上One（右）比iPhone 5（左）厚1.7mm，但前者機背微彎，更合手形。

雖然現在單用外置喇叭都聽到Beats Audio音效，但隨機都細心地送埋耳機。

聲音靚介面新

畫面一流，估唔到聲音仲正！此機採用的喇叭技術叫作「BoomSound」，破格地把單元由傳統機底搬到機面，令座枱或手持時聲音不受阻隔，配合任何時候都用得嘅Beats Audio音效，實測見就算音量只有50%，但輸出已經雄渾有力！系統行Jelly Bean唔算出奇，驚喜反而是介面升呢至Sense 5.0，除把首頁縮至5頁並把大型Widgets棄掉，令介面更集中外，還首度加入BlinkFeed動態首頁，用戶可把新聞及社交訊息整合為一頁，方便隨時閱讀，而且懂得自行更新，比一路睇開的RSS新聞更為貼心！

金屬機背簡約有型，除了銀色，同期還有全黑機身選擇。售價︰待定	HTC會跟Belkin、Speck、Otter Box等廠商合作，在One發售同期推出手機殼。	鏡頭雖只得400萬像素，但在UltraPixel技術下，成像提升，拍攝更清晰。
BlinkFeed頁面把新聞及社交訊息合為一版，方便閱覽。	試相區預錄3秒後，可以再替相中人揀選合適表情，唔怕對方冇望鏡而要重新影過。	透過Zoe模式，用戶可併合相片，自製千手觀音效果。