COOKING HAY HAY搞笑煮意

恨做明星自製專頁

進入HayHay的YouTube專頁，發現短片總觀看次數近2,000萬次，數字幾得人驚！他自言唔鍾意讀書，畢業後做過剪接影片等工作，但其實最想係走到幕前做明星。「男明星唔同女明星，唔一定要靠樣，仲要講心機、創意同自我風格。」可惜「做星無門」，3年前遂於YouTube開設個人專頁玩自拍。「最初拍啲片冇乜人睇，試過玩真人版Stop Motion又反應麻麻，到後來拍煮嘢食片先有啲反應。」點解拍煮嘢食片？鋼條身形嘅HayHay話自己本身鍾意食嘢，加上嗰期《Cooking Mama》遊戲勁Hit，於是以Cooking HayHay網名開始將片擺上網。

5分鐘片10個鐘工夫

「一般教煮餸嘅片都係鹽幾茶匙、糖幾茶匙，確實有啲悶。」HayHay改以無厘頭風格拍片，通常都係教一些易煮的小食，其他人睇完可以跟住學。當然，短片放得上網，Like佢嘅人會話佢好搞笑，Dislike佢嘅人會話佢好無聊，但肯定嘅係佢每段片背後都花咗好多心機。「每個菜式我都預先睇過做過，之後才開機拍。好似拍一段5分鐘嘅片，拍攝時間便要2~3小時，剪片又要1~2小時，配字幕再花3~4小時，加加埋埋隨時要10個鐘先搞掂一段片，搞完周身散晒。」他補充，起初拍片比較懶，幾星期至一個月才Upload一段新片，依家就一個星期拍3段片。「我拍片嘅題材來自生活，係大家容易接觸到嘅人同事，只係用較誇張嘅方法去表達啫。」

日本人氣Channel合作

在人氣影片常排頭幾位嘅Cooking HayHay，有時在短片內會發現其他主角，仲同網絡紅人如司徒夾帶等Crossover。「有時拍到悶悶哋，搞吓新意思啫！但我最享受係One Man Band，一腳踢自編自導自演自剪，成段片都係自我作品。不過試過有一次蝦碌，拍段片教人煮雞蛋，又煎又烚又炸，點知拍完先發覺未Roll機，要臨時臨急搵材料拍過，真係好難忘。」

講到難忘，肯定要數上月佢被邀請到YouTube Space Tokyo參與開幕，這是繼倫敦和洛杉磯後，全球第3間創作坊，讓網友可於設備充足的Studio內，學習、分享和創作短片，藉此提高網上影片質素。作為香港唯一代表，他當然不會放過這機會，仲同日本人氣YouTube Channel「劇團SQUASH」合作，製作出魚肉茄子溝白色吸血鬼Stalking Vampire短片。

負面評語當耳邊風

至於第2段港日Crossover短片現正進行後期製作，預計呢幾天便會上載。跟其他媒體不同，由網絡發布的資訊反應又快又直接，網民除了會直接在網上Like或Dislike外，仲會留言講啲難聽說話，HayHay話食得鹹魚抵得渴：「有啲第一句就講晒粗口，專登嚟踩你，我又唔會太Care；如果有留言係話我未夠搞笑，我真係會返去諗吓。Dislike你嘅人總是無可避免，人數可能有一千幾百，但Like你嘅人斷萬計喎！」

學鳴：想拍就拍

跟HayHay亦師亦友的學鳴（司徒夾帶），覺得佢既勤快又多產，有好高可塑性：「除咗正經嘢之外，佢好多主題都可以Handle到，市場闊好多。」至於新手想拍片的話，學鳴寄語「想拍就拍」，唔好有太多顧慮，總不能滿足晒所有觀眾要求，或者諗埋佢哋有乜反應。總之一切應以自己過癮為先，好多嘢拍完出來才知好或唔好。

單反拍片成主流

電視台拍片可能用專業攝錄機，但現時好多YouTuber都會用數碼單反，一支腳架接上相機即可自己拍片。HayHay本身係用Canon EOS 60D，貪佢拍片有質感，又可因應唔同情況換鏡頭。但係要令段片冇咁悶，事後剪接不可少。

「劇團SQUASH」驚慄上位

今次Cooking HayHay在YouTube的跨國界合作，對方係來自日本嘅「劇團SQUASH」。佢哋喺2011年YouTube NextUp中入選最後10強而成為YouTube合作夥伴，喺魚肉茄子片中出現的白色吸血鬼，就係驚慄系列Stalking Vampire招牌角色。

網址：www.youtube.com/user/SQUASHfilms

撰文：布偉倫

部分攝影：陳世昌（部分相片由受訪者提供）