SMART Camera 特效潮拍一App分享

從月初日本CP+相機展可預測今年將會係DC天下，Samsung新出嘅SMART Camera WB280F就係一個好例子，本身備有24mm廣角18倍變焦鏡頭，再加上多種特效濾鏡已相當好玩。佢仲係第一部支援SMART Camera 2.0技術嘅相機，一個App便可做到遙控取景、同步即拍兼無線分享功能！

售價：$2,190

玩盡無線功能

Samsung比其他廠商在DC網絡功能上行快幾步，惟上代SMART Camera相機要喺手機或平板安裝幾個Apps去做唔同功能，好似無線傳相要用《MobileLink》，無線取景要用《Remote ViewFinder》，玩上手都幾煩。今年SMART Camera終於升上2.0版本，WB280F屬首部支援新功能嘅相機，可以一個App做晒無線取景和傳相功能，更追加AutoShare可將相機拍到嘅靚相同步到智能裝置。現時已備有iOS及Android版《SMART Camera》App供免費下載。

18倍變焦鏡頭

除了主打無線操控外，新機嘅拍攝功能都勁好玩，內置一支24~432mm 18倍變焦鏡頭，小記喺金鐘海邊試影時，可Zoom到泊喺對岸嘅郵輪。而且機身配備1,420萬像素背照式BSI CMOS感光元件、3吋輕觸式屏幕，仲內置彈出式閃燈，以定價二千元左右嘅平機嚟講，有咁強功能認真抵玩。實拍所見，雖然鏡頭成像力只屬一般，但內置特效濾鏡和無線功能都幾好玩，迎合時下年輕人喜歡一影完相即刻擺上網嘅習慣。

新版《SMART Camera》一App便可玩晒遙控拍攝和傳相功能。

WB280F 乃長炮一族，影過對面海都冇難度。

一開三攝影效果

Best Face係其中一個好玩又實用嘅功能，可以根據人面連拍多張相，再由用家揀選最合適嘅一張，要知道好多時影大合照，總有一兩個人唔覺意眨眼、矇眼或者露出奇怪表情，以呢個功能影相肯定靚晒。另一特別功能Split Shot提供橫度或直度、一開二或一開三嘅攝影效果，仲備有自訂間隔淡化畫面，以及喺每格影像中開啟唔同特效拍攝，Share到社交網站應可博到幾多Like！