開運有方向 人人跟住上

癸巳年整體運程

寶源師傅話今年癸巳蛇年，天干癸五行屬水，而地支巳五行就屬火，本來天水地火，六十四卦上是水火既濟，屬上佳之運，但癸火和巳火都屬陰，表示發展有限，而且屬唔正路，例如房地產唔應該再升，但仍會上升，政局唔應該混亂，但會繼續混亂，小市民最唔想見到嘅通脹，就會繼續通脹，但好在都難以持續，秋天後自會好轉。最憂心一點就係五黃入中宮，唔出門都會生病惹官非，估計各種嘅病毒會繼續肆虐，讀者要小心身體。另外，人多集中嘅地方少去為妙，因為會有大型意外發生；至於做生意，各行業都有不錯嘅發展，水火都係動態，所以人流物流滾滾來，賺錢絕冇問題，只係水火流動助旺土價高升，所以租金會成為首要負擔，影響深遠。

最佳出門時間

睇完運程後，今日又點呢？正月初一係丁未日，在建除十二神中由執日當值，是日宜求財、祈福、求子、祭祀、買樓，所以出外拜年絕對冇問題，但最好先轉轉大運，就更好不過。至於禁忌就係搬家和遠遊，如果初一要去歐美旅行嘅朋友，可以先轉大運再去機場，咁就唔怕沖忌。至於最佳時辰，如果要上頭炷香，就要選擇子時前，即係半夜一點前上香，之後丑時，即一時後已經唔係咁好，至於出門拜年時間選擇好少，早上9點至11點最旺，其餘時間要到下午5點至7點，但如果一定要喺唔好嘅時辰出門，建議照開運方向轉個大運，自能化解一切禁忌。

想讀書聰明嘅朋友，記住今年嘅文昌位喺東南方呀！

今年桃花位喺正北方，買支桃花放喺度，掂硬。

揀好時辰，計啱方位，行大運一定馬到功成。

開運添福有方向：東北求財運

今年九宮飛星嘅財位，落喺艮宮嘅東北方，五行屬土，而初一財星就喺西南，原本兩個都係好方位，但西南同時又係巨門星值日，會有小病纏身，搵埋都唔夠貼醫生，所以師傅建議都係朝東北方一直向前走，走至大型銀行門口，愈多提款機就愈好，然後走埋去（逗）佢一千幾百出嚟袋吓，等你成年荷包常滿，大富大貴。艮屬少男，所以一家出門最好由細仔負責㩒錢，再分派畀家人，自然更添旺氣。至於衣服方面，着上黃、咖啡、古銅等顏色效果更佳，至於啲錢最好唔用，要嚟壓荷包。

去財位方向嘅銀行攞啲錢放喺荷包，會增強財運。

西北求升職

今年升官發財嘅武曲星，飛落西北乾宮位，五行屬金，而乾位又代表家中嘅父親，所以父親喺大年初一向西北方行個大運，絕對百利而無一害，除咗可以加強升職運外，仲有外快賺，一家自然豐衣足食。而想步步高升，除咗出門朝西北一直走外，最好走入大廈搭車立上頂樓，到達後記住出車立吸吸靈氣先至好落樓，如果冇大廈，可走入商場搭扶手電梯上頂層，喺上面走個圈至好落嚟。由於乾宮五行屬金，衣服可以着金色、白色、杏色等特別有幫助，辦公位置亦宜以此色布置。

東南求學業

今年嘅文昌星飛落東南方巽宮，五行屬木，而巽位代表長女，所以家中長女今年讀書絕對冇問題，至於家中冇長女或者其他弟妹又點算？師傅話大年初一，全家出門向東南方走，最好走去書報攤或者七仔，之後由小朋友買本圖書，自會讀書聰明，開卷有益。但如果東南方冇書報攤或者咁啱休息，那父母最好為每個小朋友準備四支鉛筆，行到要返轉頭時，就把鉛筆分畀小朋友，文曲以四數為代表，所以父母送四筆鉛筆，能增添小朋友讀書運，如果買唔切，可手寫讀書進步四字轉送亦可以。

正北求姻緣

今年負責桃花運嘅貪狼星，飛落正北方坎宮，五行屬水，坎宮代表少男，即係第二仔會有好強桃花。其他人想有桃花，師傅話只要喺大年初一向正北方一直行，最好去花店買花，跟住擺喺屋企嘅正北位置，花嘅數目係雙數，顏色最好係屬水嘅藍色或者可以生旺水嘅金色或白色，而自己着衫就最好係黑、白色或者藍色，可借水氣催旺人緣桃花。如果當日搵唔到花店，可以去大型商場打個白鴿轉，逢人見面就打聲招呼，如果愈多人向你微笑，你嘅人緣運就會愈好，桃花自然得心應手。

拜年攻略

髮式：女生電大波浪髮型最好，因五行屬水，能助旺桃花。

　　　男生用定型水將頭髮造成尖刺，因五行屬火，能旺貴人。

衣服：女生黑白為主，帶些紅色，旺桃花同時亦能帶嚟如意。

　　　男生同樣黑白色為主帶些紅色，人緣能大增兼遇上貴人。

眼鏡：女生最好用無框嘅眼鏡，五行屬水，自然能助旺桃花。

　　　男生最好戴黑框眼鏡，五行屬水，想識女朋友靠晒佢。

鞋襪：女生拜年時唔好着尖頭高跟鞋，否則會有破財嘅事發生。

　　　男生就千萬不要着綠色或者黃色嘅鞋，否則會有是非。

內衣：女生如果能着成套紅色內衣，咁今年一定會好運。

　　　男生着黑色或紅色底褲拜年，一定會有好好嘅效果。

拜年錦囊

1. 拜年期間小朋友講咗啲唔吉利嘅嘢，別急着要佢道歉，可先由大人講句好話，例如百無禁忌，童言無忌等，別將人哋屋企變成教導小朋友嘅地方。

2. 拜年期間打爛嘢，客人別搶着清理，因各處鄉村各處例，戶主清唔清理或幾時清理，應客隨主便，勿因自己打爛就硬要清理，可能會造成反效果。

3. 拜年期間三姑六婆聚首，難免講吓是非，客人小心別太過忘形，如主人家坐埋一齊講就冇所謂，但如果主人家不在場，都係少講為妙。

4. 拜年期間食飯坐位十分講究，唔係主人安排，咪亂坐上位，因為可能仲有長輩要坐。另外，主人家冇話起筷，切忌偷吃餸菜，幾十歲畀人鬧就唔好啦！

5. 拜年期間少不免飲兩杯，如果要揸車嘅朋友就千祈咪飲，另外，記緊飲酒時量力而為，全日人人都開開心心，別因為有一兩個人飲醉酒而敗興而歸。

撰文：余家洋、布永德　

攝影：陳世昌

模特兒：Melvin、Jess、Hannah、Koyuki、Iris、Simon@Talent100

鳴謝：玄學家寶源師傅