台北直擊！ World of Tanks辣妹火力全開

最爆係廠方搵來20位軍官打扮嘅辣妹教大家打機，每日仲有一場辣妹對玩家挑戰賽，原來佢哋唔止睇得，仲幾打得！

150款坦克 大手筆宣傳

《World of Tanks》並唔係新遊戲，早於2008年已在俄羅斯推出，近年開發商銳意發展亞洲市場，更正式在台灣開設分公司。遊戲以20世紀中期戰爭為主題，融合動作、策略、模擬同線上RPG元素，收錄咗超過150款坦克等戰鬥載具，美國、德國等主力坦克都有份登場，支援最多30個玩家對戰。雖然場內只提供7對7試玩，幸好有辣妹坐鎮掙回不少分數，廠方更將成架FV4202（105）酋長式英國坦克放進攤位內，難怪吸引大批人圍觀。同場另有兩款遊戲《World of Warplanes》（戰機世界）同《World of Warships》（戰艦世界）都預計今年內喺台灣上市。

放大圖片	《World of Tanks》係現場最大攤位之一，人流旺盛。

《群龍默示錄》養龍攻日歐美

其他線上遊戲方面，以思維工坊開發的《群龍默示錄》最吸引，仲已經簽咗約進軍日本、歐洲同美國市場，唔知香港遲吓會唔會有Server呢？故事背景發生在一個人龍共存嘅世界「奧拉蒂亞」，玩家可以自由接觸同駕乘超過300種龍類。同其他飛龍遊戲最唔同嘅係今次可透過「龍巢系統」培訓飛龍及共同戰鬥，而且種類有巨龍、水龍等，3月13日便正式公測。

《霹靂神州 Online》展覽攤位擺出大型布袋戲展示飾櫃，相當搶鏡。	全場最索「正妹」就係黐住《GT5》試玩區呢位Game Girl。	《Lightning Returns: Final Fantasy XIII》監督鳥山求到場同傳媒傾偈，兼示範中文版遊戲。

《霹靂神州 Online》布袋戲改編

香港對台灣布袋戲未必熟悉，剛進行公測的《霹靂神州Online》便以劇集《霹靂神州三部曲》為藍本，玩家喺遊戲入面要扮演正道中人，以打倒大佬「棄天帝」為目標。為咗令遊戲擺脫老套嘅形象，角色設計都花過心思，「人、魔、妖、仙」四族服裝各有特色，魔族以黑紅兩色為主，而妖族更參考韓式風格！

《GT5》雖然唔算新，但用上價值逾20萬港元的84吋4K電視，感覺即刻唔同晒。	MMORPG線上遊戲《TERA》推出不久，現場不時有女Dancers在台上跳舞。	電競配件品牌亦在電玩展現身，如EXSOUND展出多款對應Dolby音效技術的耳機。
遊戲展嘅Game Girls質素超高，比香港甚至東京嘅Game Show都要高幾班。

同場加映：《GT5》84吋4K對戰

PlayStation係全場唯一家用遊戲機代表，雖然展出的遊戲作品同香港嘅亞洲遊戲展接近，譬如PS Vita 《Soul Sacrifice》及PS3 《One Piece海賊無雙2》等，但攤位內有近10部3D頭戴式顯示器HMZ-T2畀玩家試用，仲搬埋84吋4K BRAVIA電視出來玩《GT5》二人對戰。此外，不少知名遊戲製作人都親臨台灣介紹新作，好似扮春麗扮上癮嘅《Street Fighter》製作人小野義德，便即場宣傳新遊戲《Vampire Resurrection》。另有《Soul Sacrifice》稻船敬二，以及《Lightning Returns: Final Fantasy XIII》監督鳥山求，在傳媒訪談中更示範新增的中文版呢。

特派記者：布偉倫