早前爆出伊麵YoYo終於在東京成婚，一枱傳媒人七嘴八舌。有人提出首個問題：「嘩！佢哋嘅保密工夫都做得好勁喎！點解冇狗仔隊跟得到？」資深記者率先搶答：「因為被邀請嘅圈中人只係得嗰幾個，10隻手指都可以數得完。」
是的，要保密，不是沒有辦法。最重要的，是當事人真的好想堅守秘密。被狗仔隊逮着了，只怨自己做得不夠完善，或者只怪身邊朋友誠信太低。
然後有人提出第二個問題：「咁多年來伊麵都Keep得咁好，好似食咗防腐劑，真係神奇！不過實力就好麻麻，唱歌唱成咁，做戲做到咁，都可以紅咁耐，係唔係奇迹？」今次由我搶答：「近期有個好流行嘅講法，就係『運氣都係實力嘅一種』。」是的，條命生得好，是一項巨大本錢，旁人怎樣咬牙切齒，也不能逆轉上天的安排。
跟着有人提出第三個問題：「YoYo就正啦！執到件咁筍嘅老公！伊麵有錢又有事業又有觀眾緣，做極都仲有Job，冇新歌都仲Sell到演唱會，YoYo真係應該開心死，應該還得神落！」立即有公關達人搶答：「喂，講真嗰句，你點知邊個令到邊個開心啲？」是的，表面看來，女人年紀大了，能找到歸宿，才算終極幸福。但誰令誰快樂，誰教誰滿足，乃非旁觀者之感覺，更不能由旁人做判官。可以肯定的，是伊麵YoYo發布的婚禮照片，笑容一致，好有夫妻相，好靚。
網址：www.chan-wai.com