台北搶試！The Last of Us 拖女殺出屍圍
2013台北國際電玩展日前正式展開，Sony Computer Entertainment乘勢請咗幾個外國開發單位，親臨台灣見吓亞洲傳媒兼搞試玩會，當中包括紙雕風格新作《Tearaway》、PS Vita版《Killzone Mercenary》，而最有睇頭可說是電影感極重嘅末日求生遊戲《The Last of Us》，主角Joel帶住少女Ellie同靚女Tess邊逃生邊打喪屍，難得嘅係可作全球首度試玩！
靚女Tess幫手
《The Last of Us》由開發《Uncharted》嘅Naughty Dog公司主理，去年E3遊戲展一公開已擸走好多獎項，到台北電玩展終於可以畀傳媒作全球首試！之前公開咗嘅劇情係男主角Joel帶住少女Ellie在瘟疫隔離區走難，今次加入新女角Tess，小記即場試玩「The Outskirts」場景，Joel要帶住兩位女角逃走到Capital Building。開發小組話唔想做隻齋打喪屍嘅遊戲，而係想講溫情同埋人性。
光源效果真實
未玩「The Outskirts」版圖之前，開發小組提大家要留意光源處理效果，佢哋話用上超真實嘅即時光源處理，冇其他遊戲用過。小記一玩就發現佢哋冇講大話，主角開着電筒時可見超像真嘅擴射效果，控制Joel走到水管下面，可見水花打落佢身上時勁逼真。當主角被喪屍擒住時，女角仲會幫拖。而試玩版出現嘅受感染人類Runner同Clicker都惡形惡相，前者鍾意成群結隊出動；後者單獨行動、觸覺敏銳，但由於佢靠聽覺定位，只要掟磚頭或玻璃樽便可引開佢。
Runner圍咬難甩身
雖然喪屍現身頻率唔高，但主角彈藥少，需要執鉸剪、膠紙整土製武器，玩到中途畀幾隻Runner「圍」都幾難脫身，小記「死咗」3次先過關。此外，遊戲嘅驚慄氣氛確實做得好好，加埋音效足可令玩家腎上腺素飆升，開發小組話係從幾年前得獎電影《No Country for Old Men》（二百萬奪命奇案）得到啟發。雖然在問答環節上，開發小組話仲有好多未確定元素，但試玩版嘅水準超高，仲會有埋中文版添！
同場加映：《Tearaway》紙公仔送信
《LittleBigPlanet》製作團隊開發嘅PS Vita新作《Tearaway》，改玩奇趣嘅紙雕風格，角色、場景等均由色彩繽紛嘅紙製造，觀感別樹一幟！主角分別係男信差iota同女信差atoi，需進行送信大冒險，靠掟石頭到圓形靶心，觸動機關打開紙籠困住怪物。當日小記試玩Sogport小島關卡，操作唔算難，可以將主角縮成球形穿越圍欄，亦可沿住紙牆膠紙迹滾到高處。遊戲仲支援打印功能，能夠將角色印出來摺成紙板玩具，呢個設計真係正！
平台：PS Vita
推出日期：待定
《Killzone Mercenary》流動快感
開發小組強調PS Vita上推出《Killzone Mercenary》，係用番家用版《Killzone》嘅引擎，用手提遊戲機打槍Game都唔會差過PS3咁話。小記玩過現場提供嘅多人對戰版，畫面表現有九成以上PS3水準！操作亦加入咗PS Vita嘅輕觸功能，好似用手指一畫便可近距離鋸頸，捽機背可在Sniper模式Zoom近Zoom遠。至於玩落最大唔同係今次可以自由接Job，賺夠錢可以喺BlackJack Store買武器和裝備，甚至可買埋今集新增嘅8個Van-guard道具改變戰局，例如可遙控無人駕駛飛機從後突襲敵人。
平台：PS Vita
推出日期：9月17日
特派記者：布偉倫
鳴謝：Sony Computer Entertainment Hong Kong