最佳損友 1:4 T-800阿諾登場

老牌大廠Enterbay深明此理，最近將舊作1:4未來戰士T-800阿諾「糟質」，爛面、爛胸、爛腳不在話下，仲要送埋隻假手畀粉絲換，最佳「損」友非佢莫屬！

為舊作補完

1:4可動Figure並非Enterbay首創，但發揚光大嘅一定係佢，自首作T-800叫好又叫座後，其後Rambo、蝙蝠俠、小丑及李小龍的HD Masterpiece系列同樣評價不俗。來到第6炮，在「拉打一號」未出前，廠商特別回應粉絲訴求，花費1年時間為T-800加入戰損元素，不但強化全身服裝的破爛程度，還追加前作沒有的火神炮及灰色汗衫，為Figure來個補完。

頭雕神似度極高，人肉及機械頭骨層次分明。

後腦設有機關，一按即可讓右眼亮起紅光約20秒。

右眼亮紅燈

無論玩正常版或戰損版，頭雕毫無疑問係靈魂所在。新作繼續由YJ Park與Scuderia聯手操刀，觀乎賣街的大貨，神似度已相當高，輪廓、皺紋、眼神等拿捏到位，而且機械及人肉部分的塗色分明，絲毫沒有飛油問題。若不是被軟膠箭豬頭出賣，單看相片還以為係阿諾真人上身。自魔盜王開始，廠方喜愛加入電動元素，今次亦一樣，只要撳一吓後尾枕嘅機關，右眼LED燈即會發出紅光，殺氣十足！

為避免心口爛肉位甩油，上身包膠用料由TPR橡膠變成PVC。	左臂備有半截機械手，忠於電影原著。	左膝有爛肉，褲管破爛位更係人手製作，更具真實感！

改良爛肉Body

Body則由舊作HD1004改良而來，廠商把它重新命名為HD4，主要是於心口及左邊膝蓋加入爛肉設計，並統一了全身膚色，以及為30個關節調校鬆緊度，令18吋素體企得穩之餘，又能輕鬆擺出不同動作。另外，前作的左臂可換上機械手，今次則有半截可換，但由於接口不同，新舊兩隻機械手不能交替使用，買家咪亂試啊！至於武器，榴彈炮、子彈及火神炮都以半金屬製成，極具質感，火神炮更內置滑輪讓槍管轉動，夠晒認真！

皮褲及鞋均經過舊化，但略嫌輕手咗，效果唔夠誇。	HD4素體足有18吋之高，並提供30個關節，雙手拎炮都好自然。	榴彈炮以金屬及木材混合製成，並附送子彈同肩帶。
附送4對造型手，可惜地台欠缺特色。

撰文︰陳志滔　

攝影︰謝孝祥　

查詢電話︰2332 3615