E-PM2觸細待發

話咁快2012年就到最後一日，還以為新機都出得九九十十，Olympus卻仲有驚喜畀大家，壓軸推出PEN mini E-PM2，以簡便觸控影靚相迎接新一年。系列叫得做mini，外形當然以輕同細作賣點，仲有4隻顏色供選擇，影友們一於新年帶住新機周圍Snapshot啦！

售價：$4,990（連14~42mm鏡頭，2013年1月中推出）

旗艦級規格

對影相有要求的玩家，相機外觀還屬其次，最重要係影相夠靚，E-PM2用上同廠旗艦級OM-D幾乎一樣的規格，配備1,605萬像素感光元件，畫質細膩兼銳利度高，配合TruePic VI影像處理器，就算用ISO 25,600超高感光度影夜景，張相都唔會有好粗微粒，連拍仲可以做到每秒8張。為順應潮流，新機採用3吋輕觸式屏幕，觸控設計除了可調校拍攝設定外，還支援篤芒影相功能，點一點屏幕便能自動對焦抓拍。

機身小改造

定位入門的E-PM2夠薄又夠細，機身多處用上塑膠材料打造，故僅重223g，就算女仔都可單手Snapshot，並提供黑、白、銀、紅4種大熱顏色選擇。機身設計則有很多地方參照同門E-PL5，驟眼睇十足孖生兄弟，最特別是加入固定式手柄，揸機時較上代更好手感，就算配上長炮鏡頭依然可穩定捕捉影像，而且機頂引入「Fn」功能鍵，用家可自行設置常用功能，加上機背的按鍵經重新鋪排，操作更加人性化。

放大圖片

提供黑、銀、白、紅4種顏色選擇，當中以紅色最Sharp！

E-PM2屏幕設有輕觸式自動對焦快門功能，篤芒即影相，反應靈敏。

12種藝術濾鏡

現時玩相機又點可以缺少藝術濾鏡呢？新機備有12種之多，當中新增水彩效果，可營造出繽紛水彩畫面，而且新機支援FlashAir記憶卡，能夠無線連結智能裝置，讓用家輕鬆將靚相上載至社交網站，隨時隨地分享身邊趣事。此外，同場還展示了全新M.Zuiko Digital 17mm F1.8鏡頭，換乘後相當於135格式34mm焦距，加上F1.8超大光圈，輕易抓拍出迷人散景效果。

全新17mm F1.8鏡頭，金屬鏡身成像不俗，Snapshot一流。售價：$3,990	由於採用觸控屏幕，所以換上新操作介面，富有新鮮感。	12種藝術濾鏡有排玩，仲細分為39種效果畀你發揮創意。
背後按鍵經重新鋪排，還加設軟膠令手持時更穩定。	機頂新增「Fn」鍵，可設置常用功能提升拍攝效率。	Hotshoe和多功能插頭，方便加裝閃光燈和觀景器。