AGS率先試！ Soul Sacrifice考驗人性交叉點
PS Vita推出以來，獨佔嘅遊戲唔多，不過由神級製作人稻船敬二主理嘅《Soul Sacrifice》，應可吸引玩家買機！新作玩法雖然似足「芒亨」，但喪斬之餘，加入咗「救贖」同「犧牲」人性化選項，時刻都要經歷人性交叉點。而12月21日開幕嘅亞洲遊戲展（AGS），PlayStation攤位便首度畀香港機迷試玩，一於4人組隊齊齊斬妖除魔！
4人連線似「芒亨」
《Soul Sacrifice》玩法幾似「芒亨」，都係4人連線打嘍囉兼巨大頭目，而且由前Capcom開發統帥稻船敬二主理，難免有抄襲之嫌。不過遊戲都唔甘心只做一隻PS Vita版「假芒亨」，改以逼真奇幻歷程作藍本，玩家將扮演被當成活祭品嘅奴隸，需聯合其他同伴，對抗由人類欲望產生嘅妖魔，呢方面就跟接屠龍任務唔同！小記試玩遊戲時，無論行動同斬怪都極之爽快，而且打低嘍囉或同伴瀕死時，都會跳入「救贖」同「犧牲」選擇畫面。
救贖與犧牲選項
當打低妖物時，揀「救贖」會轉為恢復生命力同能力，而揀「犧牲」便會增加自己的魔法攻擊力。但如果同伴瀕死，揀「犧牲」同伴有乜着數？就係可使出強大魔法，有時打Boss迫於無奈，都要犧牲同伴o架！不過被「犧牲」嘅玩家都唔會無所事事，可化為靈魂幫手搵出頭目嘅弱點，甚至可施展有限嘅魔法作戰。大家喺AGS試玩時，被人「犧牲」後記得以和為貴！除咗有得現場試玩之外，製作人稻船敬二更會於12月21日來港出席大會活動，而簽名會將於傍晚6點舉行，機迷記得捧場。
同場加映：PS Vita新作AGS登場：《AKB 1/149戀愛總選舉》飛甩偶像
AKB遊戲第一次在PS Vita推出，今次登場嘅唔止AKB48，仲有埋姊妹偶像團隊SKE48、NMB48同埋HKT48，但玩法唔似一般追女Games，玩家嘅「任務」係要逐個飛甩追求你嘅偶像，到剩低最後一個為止，只嫌AGS現場唔夠時間睇真偶像囉！
推出日期：12月20日
《箱！-OPEN ME-》AR開箱
未試過用PS Vita玩AR擴增實境遊戲？今年AGS設有專區畀大家體驗，最新作品係《箱！-OPEN ME-》。顧名思義以PS Vita機背鏡頭對準特製卡紙，畫面便會出現形形色色嘅箱子，大家需要動腦筋開箱，玩落都幾有挑戰性！
推出日期：12月20日
撰文：布偉倫
部分攝影：盧展程