克拉科夫聖誕市集 打鐵趁熱

無他，波蘭是一個天主教國家，上任教宗若望保祿二世，便曾於克拉科夫擔任總主教，因此當地聖誕氣氛特別濃厚，加上克拉科夫擁有東歐最大的聖誕市集，氣氛熱烈，即時驅走寒氣，所以諗多無謂，立即去片仲好啦！

自家製×大笪地

有逛過聖誕市集，可能心諗咪又係賣聖誕樹和擺設，哪會有甚麼「花臣」？踏進舉辦聖誕市集的中央廣場（Rynek Glówny），沒有誇張的燈飾布置，又聽不到現場播放熱鬧的聖誕音樂，但偌大的廣場配上旁邊莊嚴又高聳的St. Mary's Basilica，完全展現出平實而虔誠的波蘭Style！市集充滿地道風味，猶如大笪地，有些攤檔拿出自家製的商品，有些則有即場表演技藝，場面好比嘉年華般熱鬧，當中印象最深刻的，莫過於不時發出噹噹鏗鏘打鐵聲的鐵匠店，老闆即場示範打鐵，又會開動小熔爐，交足戲的表情已令圍觀的人看得津津有味，加上擺賣馬蹄鐵和小盾牌等仿古鐵器外，還「剛中帶柔」地有鐵玫瑰和戒子出售，計我話蜜運中的朋友應該趁機買枝即場求婚！

傳統的烤芝士餃子，是波蘭人冬天最愛小食，索價2zt（約HK$4.8）。

波蘭真係靚女多？睇下朱古力攤檔的老闆娘就知啦！

美食熱酒隨處有

拖友就話有情飲水飽，好在一支公的小記都搵到間靚女開設的朱古力店，賣的是一串串沾滿朱古力漿的香蕉、士多啤梨或棉花糖，而且幾蚊波蘭幣就有交易。如果想真正醫肚，市集中央則有兩家燈火通明的小吃店，出售豬髀肉、串燒和血腸等波蘭傳統街頭熱食，再到旁邊外貌如酒桶的熱酒專賣攤位，買杯Mulled Wine（熱葡萄酒），它是歐洲傳統的冬天飲料，以玉桂和薑糖等香料調配而成，酒精味不刺鼻，味道也相當香甜，沒喝酒習慣的朋友也可一試，而且有明顯的驅寒效用，真係一杯到肚寒氣全消！

唔係打劫，不過要影相都係要留下幾蚊「買路錢」！	鐵鉆上是正宗紅卜卜的出爐鐵，唔打唔得。	金屬玫瑰色彩眾多，不讓鮮花專美，索價20zt（約HK$48）/枝。

千年貿易商城

買得興起，喚起了心中的Shopping魔點算好？市集另一邊的The Cloth Hall內有54家小商店，貨品以紀念品為主，如波蘭特產的琥珀飾品，當地足球會的頸巾、色彩繽紛的國際象棋，以及傳統工藝品等，難得是售價沒有因地利而被抬起，甚至還可以講價呢！現在的The Cloth Hall雖然是二次大戰後重建，但其歷史可追溯至1300年，當年乃歐洲最大的市場之一，克拉科夫本身更是波蘭的開國首都，歷史故事俯拾皆是，1978年更被聯合國教育科學文化組織列入世界文化遺產名錄中呢！

教堂上七彩的玻璃窗帶不走，但可購買這些小擺設補數。	土炮出品的蜂蜜酒雖然賣相一般，但飲落真係幾滋潤。	揀揀吓糖果，驚見Psy大叔勁過蒙古人，已打到東歐！

Kraków Christmas market

地址：Main Market Square, Kraków
營業日期：即日至12月26日
營業時間：1:00pm~8:00pm

Rynek Underground展出2005年挖掘中央廣場古蹟的情況。	St. Mary's Basilica內的裝潢金碧輝煌，加上藍藍綠綠的玻璃彩繪，壯觀得令人驚嘆。	琥珀是波蘭特產，頸鏈、手鏈或耳環樣樣有齊。

高高的Town Hall Tower是中央廣場重要地標之一。	骰子原是鐵匠將剩下的材料，合成小粒變成小朋友的玩具。	就算是一般日子，教堂也經常有信眾來參拜，人氣相當鼎盛。
The Cloth Hall內有54間小店，紀念品款式齊全，售價也沒特別偏貴。

地下博物館　歷史痕迹

如果對中央廣場的歷史有興趣的話，不如到The Cloth Hall的地下博物館（Rynek Underground）參觀，據知展品大多數於2005年出土，從資料相片可見，200平方米的中央廣場被「地氈式」發掘，出土了不少經商留下的痕迹，當中以鐵匠業（Blacksmith）最豐盛，由原來簡單的平面鑄造，慢慢細分成戒子、兵器及門鎖等不同時期的金屬製品，同時解答了為何聖誕市集會有鐵匠舖出現。

此外，St. Mary's Basilica亦於同時期建成，15世紀加建成現今樣貌，80米高的紅色外牆裏面，是金光閃閃的耶穌及聖母畫像，加上陽光透過七色的玻璃窗畫灑在虔誠的信徒背上，有種予人透不過氣的莊嚴感。

The Cloth Hall

地址：Rynek Glówny 1-3, Kraków

營業時間：11:00pm~8:00pm

Rynek Underground

地址：Rynek Glówny 1, Kraków

開放時間：10:00am~8:00pm（星期三至一）10:00am~4:00pm（星期二）

休息日：每月第一個星期二

收費：17zt（約HK$40.8）

查詢：（48）124 265 060

網址：www.podziemiarynku.com

St. Mary's Basilica

地址：Pl. Mariacki 5, Kraków

開放時間：11:30am~6:00pm（星期一至六）2:00pm~6:00pm（星期日及假日）

TRAVEL NOTES

簽證：持BNO或特區護照毋須簽證

機票：乘坐漢莎航空，由香港經柏林至克拉科夫，來回經濟客位機票約HK$8,180起

貨幣：1zt約兌HK$2.4

天氣：12月氣溫約-4℃~2℃

特派記者：李家俊

鳴謝：Lufthansa、besthotelonline.com