2,410萬像素D5200　特「色」扭芒

Nikon新機一浪接一浪，早前先推出D600全片幅單反、Nikon 1 V2換鏡細機，近日又有D5200扭芒入門單反登場，賣點是於平價機內植入中階規格，單係2,410萬像素經已吸引。新機預計12月中正式上架，大可買來做聖誕禮物！

搭載中階規格

以上代D5100為基礎的D5200，畫質和像素均顯著提升，特別用上2,410萬像素CMOS，配合EXPEED 3影像處理器，令感光度可擴展至Hi 2（ISO 25,600），唔使用腳架都可以拍攝出亮麗夜景燈飾。此外，新機採用同門D7000的Multi-CAM4800DX對焦系統，內置39點對焦點，令對焦分布更精確。為滿足拍片人士需要，機身除了支援1,080p攝錄外，收音亦經過強化，特別於機頂加設立體聲收音咪，旁邊還備有外置咪插口，保證聲畫都咁靚。

靈活翻芒自拍

扭芒設計於Nikon單反中並不常見，D5200可算是鮮有機種，3吋屏幕可向外翻180度，還可向前後扭轉270度，方便用家自拍取景。雖然外觀上冇乜改變，但機頂新增了一個驅動程式按鍵，切換自拍、連拍一按搞掂。有見近年很多相機都玩Colorful設計，新機亦在傳統的黑色外，引入紅色和青銅色機身。此外，影相又點少得趣味無窮的濾鏡效果，新機的特效具備7種之多，不僅適用於相片，仲可以套入短片之內，當中較為特別的保留特定色彩效果，影相時可保留3種影像顏色，其他顏色將以黑白顯示，用來突出主體就最啱。