保時捷經典車重現神采

老爺車,有錢就可以買到,但保養並非人人識做,好像保時捷經典跑車Porsche 356,即使部分車齡已超過60年,但世上仍有不少行得走得,皆因原廠設有專責Classic Car的部門所致。最近香港保時捷中心推出這項「Porsche Classic Card」計劃,將經典保時捷的維修保養服務帶到香港,廠方不只有資深師傅坐鎮,連半世紀前的大部分保時捷維修手冊和工具都保留下來,將來無論遇到任何頭暈身都不用發愁。

目前大概有70%的保時捷經典型號仍在路面行走,本港亦有不少Classic Porsche的收藏家,香港保時捷中心推出這項「Porsche Classic Card」計劃,正好為這些收藏家提供全面支援,當中包括老爺車翻新、維修和保養等服務,香港保時捷中心售後服務經理譚鼎乾指出:「近年愈嚟愈多人鍾意收藏氣冷(Air Cooled)保時捷,尤其是356、964 RSR、964 Speedster Sonderwunsch等較罕有嘅型號,市場上易手保時捷嘅車價亦持續上升,潛力好大。好多客人花百幾二百萬買部老爺車,都唔想求其搵間車房做維修;我哋唔只有專用嘅維修工具,德國廠房仲有超過38,000種零件,最快一個星期就運抵本港,相比其他坊間車房無法做到。」

零件供應有妙法

保養老爺車最頭痛之處,正是零件短缺,即使原廠已有大量現成零件,萬一遇上缺貨怎麼辦?譚先生表示:「世界各地嘅代理都會互相合作,有時廠方冇嘅零件,我們都有機會搵到;就算真係冇,廠方甚至會搵番當年嘅設計草圖,搵新嘅供應商翻做零件。」如此專業,試問有哪一間車房可以做得到?譚先生補充:「好多收藏家都鍾意儲埋證書,返廠做保養唔只有捷成維修紀錄,仲可以幫車主搵番出廠時嘅規格、底盤及引擎號碼等完整紀錄,邊部分係原裝、邊啲係新加,都可以翻查得到。」現時香港保時捷中心尚有小量70、80年代的保時捷車主手冊出售,假如閣下早已遺失,就要把握機會補購了。

定時出巡保狀態

至於「Porsche Classic Card」計劃的服務內容不限於車身修飾,而是令每部經典保時捷重現神采,不只得個樣,行得走得才是最重要,譚先生說:「好多人以為老爺車嘅里數愈低愈好,實情係愈擺愈壞,好似橡膠擺得耐都會變質,我哋建議車主每個月最少揸兩次,最低限度都撻吓部車,擺車嘅空間亦要通風,可以減少零件生銹嘅機會。由於車漆需要透氣,如果用車套嘅話,一定要揀透氣款式,否則會導致變質,而且唔可以用含有矽(Silicon)嘅車蠟。」代理指出,成為「Porsche Classic Card」會員的顧客可享有多重優惠,包括維修及精品折扣等,零件及噴油更分別有兩年及三年的保養期。

資料:由客戶提供

查詢:2926 6261(保時捷售後服務中心)