東京搶試Wii U 扮刺客 打喪屍

另有喺12月初Wii U首賣日同步開售嘅喪屍遊戲《ZombiU》，可以用GamePad睇地圖、揀道具兼變成掃描器，絕對係打機新體驗！

《Assassin's Creed III》降臨3大平台

《Assassin's Creed》系列係Ubisoft嘅王牌作品，來到第3集自然不惜工本大搞宣傳，小記於「Ubi Day 2012」試玩區所見，無論PS3、Xbox 360或者Wii U版都各有8個試玩台。遊戲舞台由早兩集嘅意大利同君士坦丁堡，跳到18世紀美國，主角亦變成Connor。話廠商不惜工本當然有原因，會場既請來為遊戲主角配音嘅日本著名聲優分享感想，又請得黑人演員Dante Carver即場玩Cosplay，一身裝束更係度身訂造，據講淨係服飾都花咗5位數字美元！

3個平台中，以Wii U版最受歡迎，估唔到有好多女粉絲。

不少粉絲Cosplay成刺客，佢哋當然忍唔住手玩番鋪！

新增反擊系統

遊戲試玩版以波士頓茶會事件改編，主角要喺兩艘船之間來回殲滅英軍。小記試玩時，發現可控制角色爬上桅杆或跳入水中潛行，目的係於限時內打低100個英軍。戰鬥系統亦加入即時反擊（Counter）元素，只要計準時間便能反客為主畀對手致命一擊。現場3個平台當中，以Wii U版最多人排隊，令人意外嘅係女性玩家都唔少。

試玩版要喺兩艘船之間不斷來回打低100個英軍。

Wii U獨佔嘅《ZombiU》遊戲，現場可見人山人海。

推出日期：11月15日（日文版）、11月底（中文版）

《Assassin's Creed III: Lady Liberty》要控制女主角Aveline在城中搵目標。	呢位名為Maxx嘅日本Cosplayer，以第2集主角Ezio為造型，佢話呢套服飾上網訂用咗20,000日圓。	Game迷二部恒成表示：「用Wii U GamePad體感打機唔易，但遊戲畫質同壓迫感不俗。」

《Assassin's Creed III: Lady Liberty》女主角登場

同場另有首次以女性Aveline為主角的PS Vita版《Assassin's Creed III: Lady Liberty》，雖然同樣以美國為背景，但地點改為南部新奧爾良。現場試玩版要玩家搵出接頭人，進行抵抗西班牙軍任務，仲可捽PS Vita機背控制馬車，甚至有機會同Console版主角Connor合作。

聲優浪川大輔（左）、甲斐田裕子（右），以及黑人演員Dante Carver（中）上台宣傳。	放大圖片	現場有唔少Ubisoft自家產品發售，由公仔、T恤到外套都有，開場前好多人排隊掃貨。

推出日期：10月31日（香港英文版）、11月15日（日文版）

《ZombiU》先打頭盔後爆頭

小記所見，現場嘅《ZombiU》Wii U試玩台有10部機咁多，但由於遊戲喺日本嘅注目度甚高，話晒係全新開發兼Wii U獨佔，好多玩家一入場即刻衝去排隊試玩，搞到要排個半鐘先有得玩。新作以倫敦作舞台，連遊戲宣傳Trailer都配上英國國歌，好鬼有型；不過更型係來自Wii U嘅嶄新操控方法，不僅要吼住電視幾時有喪屍撲出來，仲不時要用埋Wii U GamePad上嘅屏幕睇地圖、揀道具，甚至要當佢做掃描器睇環境，真係要一眼關七先至掂。當畀喪屍壓住時，仲要體感Fing甩佢哋。現場試玩版基本係畀玩家學吓新操控方法，雖然喪屍出現頻率唔算高，但「生命力」超強，有時甚至會見到戴晒頭盔嘅警察、軍人喪屍，第1槍要先打甩佢個頭盔，第2槍才可Headshot爆頭，比其他喪屍Game難打。

被咬變Zombie

遊戲開頭的手槍火力弱而且子彈數量有限，所以現場好多玩家拎到支板球棍後，都寧願用棍埋身打喪屍。由於喪屍實在太難打死，唔少玩家喺10分鐘試玩時限內都會死兩、三次，但遊戲有趣嘅地方係當被喪屍咬死後，原本控制嘅角色都會變成喪屍，玩家「復活」後會扮演另一新人，打低已變成喪屍嘅「自己」先得。現場差在環境太光，恐怖氣氛減弱咗！不過提提大家，由於Wii U行貨主機未有計畫在香港推出，所以《ZombiU》好大可能只會以水貨形式抵港。

推出日期：12月8日（日文版）

特派記者：布偉倫

鳴謝：Ubisoft