哈囉喂殺到嚟驚嚇解謎
仲有兩日就全城「哈囉喂」，大家諗定到蘭桂坊扮殭屍狼人，定係去潮拜「聖羅蘭」呢？萬聖節被商業化係不爭事實，主題公園、大小商場以至餐廳都以「哈囉喂」作招徠，嚇唔嚇人都係其次，最重要係篤中大家嘅消費穴。不過大家化晒妝過節嘅時候，有冇諗過「哈囉喂」嘅真正傳統？點解會同南瓜扯上關係？一於從衣、食、玩、行四方面睇吓大家知幾多！
謎團：衣
萬聖節當然要扮鬼扮馬，但化妝用的血漿對皮膚有冇害？長時間黐住假疤痕會唔會令皮膚變成真爛肉？
解密
星級化妝師Jessica話，化妝專用的特技假血漿大多無害，由於係Water Based加上用食物顏料製造，所以放入口會感到甜甜哋；另備有藥丸狀的假血漿，可輕易做到爆血效果。至於假爛肉是用黐眼睫毛的膠水固定，只要本身冇敏感、濕疹或傷口，其實不會對皮膚造成影響。「化萬聖節妝唔會太難，例如整一個嘴角流血Look，10分鐘已經搞掂；至於要黐上爛肉就要等膠水乾透，花15~20分鐘便完成。」人人都血漿配爛肉，有冇啲更有創意嘅造型？Jessica表示，想製作突出造型，大可在傷口加上煙頭、蟲或者拉鏈等假裝飾，不妨先約埋班朋友釐訂主題，一大班嘩鬼出動更搶眼。
謎團：食
現時吃萬聖節大餐，見嚟見去都係扮成眼球、斷指嘅血淋淋食物，邊啲先喺傳統食品呢？係唔係有南瓜就係呢？
解密
萬聖節流行於撒克遜人（Saxons）後裔聚居的不列顛群島、美國、澳洲、加拿大等地。由喺英國出生，曾喺威爾斯、悉尼當大廚而現為香港隆堡蘭桂坊酒店Azure Restaurant Slash Bar總廚的James Oakley講傳統食品就最適合。他指出：「傳統萬聖節菜式如南瓜批、焦糖爆谷及蘸上糖漿的Candy Apple，款式比較簡單，但現時的菜式改用現代化技巧炮製，將驚慄造型加入食材之中，各有特色。」但點解會用南瓜做食材？James話主因是萬聖節期間南瓜當造，入饌當然最好。
謎團：玩
「Trick or Treat」到底點玩？使唔使扮鬼等小朋友敲門？
解密
有冇試過萬聖節夜晚，有唔識嘅小朋友拍門攞糖？如果咁啱撞到，大家會點樣應對？James今年首次喺香港過萬聖節，佢話歐洲好興這傳統習俗，當晚會有小朋友畫晒花面貓、Dress up過先去拍門，大家都好識做咁樣自動派糖，唔會畀佢哋以此為藉口搗蛋。當然，如果本身喺屋企開緊萬聖節派對，扮鬼去應門都唔出奇。
謎團：行
想感受萬聖節氣氛，總離唔開去主題公園。其他地方有冇「撞鬼」行程呢？
解密
美國明尼蘇達州Anoka被稱為「世界萬聖節之都」，萬聖節期間有大型巡遊，但一來路程既遠，二來跟去主題公園過節分別不大。靈異節目主持人雲海表示，如果想近近哋去尋幽探秘，都有一些景點推介。「第一個係位於東京上野公園行入少少嘅谷中靈園，呢度除咗埋葬了德川家康家族成員外，十幾年前更發生咗好多擘大口、瞳孔放大嘅貓屍體，狀似被嚇死模樣，連電視新聞都有報道。另一個係位於大連旅順，據傳日治時期興建了一座慰靈塔，仲有一個有不少鬧鬼傳聞嘅日俄監獄，遊人可入內參觀。」
萬聖節正日？
其實11月1日先係「萬聖節」（All Hallow's Day），而10月31日係「萬聖節前夕」（All Hallows' Evenin或All Hallows' Eve），縮寫下變成Hallowe'en或Halloween；不過大家現時都會以10月31日代表萬聖節。唔理邊一日先係正日，總之都係畀個機會大家扮鬼扮馬癲番晚！
撰文：布偉倫
部分攝影：郭凱敏
模特兒：Lilam