10月是西洋鬼節，又是一班嘩鬼現身四出嚇人的時候。唔係想嚇大家，不過通常靈異事件，往往是晚上回到酒店，閂埋房門後先至會發生。雖然大部分情況都可能係自己嚇自己，不過有時卻又有可能真係……！正所謂避之則吉，不想見到的東西，始終都係避得就避有着數。想出門旅遊玩得開心、瞓得安心，以下的嘉賓意見，大家要銘記在心！
靈體，有些人成世都見唔到，但有些人則經常會遇到。對靈異事件感興趣的雲海來說，自己絕對不是後者。雖然不是經常遇到，但也有一些靈異經歷可以和大家分享。其中一次，發生在新西蘭所下榻的B&B小旅館，當日半夜，他聽到瞓隔籬床的同房友人雖然瞓着，但卻不停講英文，而且非常流利（友人本身不太懂英文），因此懷疑同房是被靈體上身，但亦只能當冇聽到，一直扮瞓，由佢噏。又有一次，他獨自一人下榻關島某酒店，半夜三更忽然聽到不斷摷行李的聲音，臨瞓前明明已Check過房門及窗戶已鎖，唯一可以做的，亦只有繼續瞓當冇事發生。
此外，不少人認為靈體會依着牆走，因此出門旅遊很多人都不喜歡住尾房，而且都會揀一張不貼牆的床嚟瞓。對此說法，雲海不太認同，事關他認為靈體可以用不同的方式移動，不會只依着牆身行。無論如何，靈體通常會利用人的視覺、聽覺、嗅覺甚至觸覺等，去引起大家的注意。萬一真的遇到，除了換房外，雲海認為「當佢冇到」是最適當的做法。
第1位 泰國桂河橋
2次大戰期間，日軍佔領泰國期間，在當地強迫盟軍的戰俘興建，令不少人因而枉死，其中連接泰緬的一段鐵路，更有死亡鐵路之稱。
第2位 東京池袋
昔日是沼澤區，被黑社會用作執行家法的行刑場，JR站亦多傳出有人跳軌自殺的消息，附近又多殯儀業。
第3位 台北信義區
日據時代曾是政治犯的刑場。
第4位 南京巿
日軍侵華時期南京不少地方曾為萬人坑，更有酒店就是建在萬人坑以上，有關酒店更常傳出鬧鬼事件。
Case 1
陳先生瞓到半夜不斷聽到有腳步聲、摷行李的聲音，但臨瞓前已Check過房門和窗戶都已鎖上。
對應方法：當聽唔到，繼續瞓。
Case 2
X小姐曾下榻盧森堡巿中心一家古堡酒店，有晚回到房間，坐在床上看文件，突發現一位的全身赤條條的男子出現眼前，起初還以為有人入錯房，直到有一隻小昆蟲飛過，才發現他的身體是透明。
對應方法： 扮到若無其事，將內衣褲和Bra拿出來周圍掛，並脫下身上所有衣服，以求一裸把他嚇走（先旨聲名，如果係鹹濕鬼的話，此方法絕對無效）。
Case 3
經常返內地做生意的港人A，有晚約埋朋友在某酒店房內打麻雀，發現打嚟打去都少咗隻牌，於是大家便周圍搵，結果在床下底找到隻牌之餘，仲發現了一具Deadbody。
對應方法：報警兼換房。
Case 4
B先生到台灣公幹，下榻台北巿一家五星出名多靈體出沒的酒店，頭兩晚都冇事發生，到最後一晚亦即第3晚，打開窗簾睇風景時，發現在玻璃窗的倒影中看到有個女人坐在床上望着他。
對應方法： 拉埋窗簾，大聲講粗口，把靈體嚇走（靈體沒有語言障礙，重心靈溝通）。
Case 5
Y女士半夜曾見過有隻手從電視機裏面慢慢伸出來。
對應方法： 若有宗教信仰，可諗經或祈禱，若冇，不妨打開手機驅鬼App，找鍾馗幫手。
Case 6
黃生黃太臨瞓前把電視機關上，但很快電視機又會自動開啟。
對應方法： 出動手機誦經App，不停播放喃無梵音，然後把電視關上。
Case 7
Z小姐瞓瞓吓覺得有嘢走近，並坐在床邊。
對應方法： 若有宗教信仰，可諗經或祈禱。
IOS：
Ghost Rader鬼雷達
此App採用傳感器測量電磁場、震動和聲音，可助你檢測身邊的超自然活動，並作出分析。
聽佛經
聽佛經可淨化心靈，亦能將不安情緒產生的雜念，心中的恐懼也會隨之而消失。
Android：
驅鬼專家Exorcism Exert
撞鬼點算?大可Show出你不同的法寶，包括避邪符咒、十字架、桃木劍，甚至找鍾馗幫你手。
念佛機
簡單易用的念佛機，會自動重複播放，內收錄了4首佛經，包括「南無阿彌陀佛」、「大悲咒」、「觀世音菩薩聖號」及「六字大明咒」。
阿飄偵測器
這程式聲稱可幫助你偵測附近是否有靈體或不乾淨的東西，並可顯示靈體在你附近的影響程度，及提供趨吉避凶的方法。
1.出發前先打聽不同地方的靈異指數。
2. 入房前敲門，並把房間內所有櫃、門、窗廉打開或趟開檢查。
3. 入到酒店房，若感到唔舒服，第一時間要求換房。
4. 避免入住船形設計的酒店，像擱淺了的船，唔老嚟。
5. 查看床褥下是否有東西及房內擺放的聖經是否打開並揭至福音驅魔的一頁。
6. 揀床不要對着梳妝鏡。
7. 不要將鞋頭指向床，以免靈體會朝鞋頭方向上床，最好一正一反咁擺。
8. 睡覺前關上房燈、電視、收音機，及把窗簾拉上。
9. 睡前把房內的鏡和電視機等用布遮蓋住。
10.晚上聽到敲門聲不要應門。
全名陳雲海，作家、旅遊家、電台主持、靈異及外星人研究者。常為香港報章、雜誌撰寫旅遊文章，以及出版靈異書籍，曾擔任《怪談》、《不明來歷》、《談談靈說說怪》等靈異節目主持。已遊歷過70多個國家及內地20個省及自治區，住酒店唔怕住尾房，最怕佢冇房。
撰文：林登麗