JE10女生隨拍窩心配套

女仔出親街都有好多嘢拎，化妝品、防UV傘、電話等，邊度仲有手拎住部相機四圍影。Casio好貼心咁推出EXILIM JE10，附有女性化設計的雙邊吊帶相機套，方便掛喺頸或者肩膀。同場仲有「外形先決」的N10、N20、N1，呢3部機嘅用色有可愛、中性和沉實選擇，總有一款啱「奄尖」的女生要求。

售價：$1,680

買機送套襯色

今次主打的JE10，明顯係以外形吸引女生，提供黑、粉紅和白3色機身，最特別是附送雙邊吊帶相機套，可調校吊帶的長度，設計猶如小手袋一樣，以千多元的機仔來說絕對有驚喜。相機套的用色亦經過特別配襯，黑色機以黑色閃亮菱形機套點綴，粉紅色機夾番粉紅色蛇紋機套，白色機則會襯啡色皮套。底部還附有螺絲設計，唔怕影相時相機鬆脫，仲可叫齊班姊妹買晒3隻色交換機套嚟用添。

增設魚眼效果

好多女士玩Gel甲，較難撳操控按鍵，廠方都留意到呢一點，於外形爆燈的JE10加設控制桿，就算留長了指甲都能輕鬆操作。此外，女仔比較鍾意自拍，新機備有26mm廣角的5倍變焦鏡頭，在BEST SHOT模式更設有一人及二人自拍模式。另內置多種場景模式及8款藝術效果濾鏡，當中新增了魚眼特效，拍攝大頭狗就啱晒。值得一提是操控介面的顏色提供黑、粉紅和白選擇，襯埋機身顏色夠晒順眼。

JE10附送吊帶相機套，啱晒女生帶出街。	備有黑、白和粉紅色介面，跟機身走同一色Tone。	BEST SHOT模式設有魚眼效果，拍攝大頭狗手到拿來。
JE10擁有3種色系，配襯的相機套亦各有不同。	相機套設有螺絲連接JE10底部的小孔，咁就唔會鬆脫。	為遷就機身設計，選用較細小巧的microSD卡。
機背特別加入控制桿，唔怕整崩女士的Gel甲。	新機強調Package設計，連包裝盒都精美過人。	試相區柔光效果所營造的氣氛不錯，令主體看起來更夢幻，而且色彩表現和暖。