SX500 IS 30倍Zoom狙擊手

好多人去旅行或郊遊,都會帶埋高倍變焦相機,貪佢可以包攬遠近景物,但輕巧DC通常都Zoom得唔夠遠,長炮DC又太大舊。想細部又Zoom得,Canon全新PowerShot SX500 IS便可兩者兼得,鏡頭擁有24~720mm變焦功能,但體積竟然比同廠的長炮SX40 HS細一個碼,一於帶住呢位迷你狙擊手投入自然懷抱。

30倍變焦穩定

SX500 IS的定位介乎長炮和遠攝DC之間,於的骰機身配上一支30倍變焦鏡頭,非常罕見。小記將新機與同廠長炮SX40 HS擺埋一齊,便可看到其體積細近40%,重量更只有318g。幸好手柄位沒有因為瘦身而縮減,提供極佳手感,無論拍攝遼闊環境,抑或Zoom近遠處人物都能輕易捕捉,配合IS防震系統,有助提升拍攝時的穩定性,就算用盡720mm拍攝都唔怕鬆郁朦。

遠攝構圖輔助

不少人使用長焦距DC都投訴,主體會容易偏離,唔知Zoom咗去邊度。為此新機加入遠攝構圖輔助功能,當使用長焦距拍攝時,只要按下鏡頭旁邊的按鈕,相機便會把鏡頭退回廣角端,以便用家追蹤主體;此時只要撥動變焦桿改變焦距,然後放開按鈕,相機便會自動變焦至所選的焦距,構圖更快捷準確。同時畫面會以白框來表示用家所選的焦距拍攝範圍,Zoom咗幾多一目了然。

「LIVE」模式

作為$3,000有找的DC,新機擁有1,600萬像素畫質,提供ISO 100~1,600感光度,並支援光圈先決、快門先決及手動等曝光模式,規格相當專業。轉盤更加設「LIVE」模式(實時控制拍攝模式),主要用途是於拍攝時,根據屏幕的影像實時調整亮度、飽和度及色調參數。新機還配備靜音模式,切換後會自動關閉閃光燈並設定成靜音,以便用家在演奏廳、博物館等地方使用。

規格表

感光元件:1,600萬像素CCD

焦距:24~720mm

光圈:F3.4~5.8

屏幕:3吋46萬像素

感光度:ISO 100~1,600

其他功能:720p拍片、超微距拍攝

體積:104×69.5×80.2mm

重量:318g

撰文、攝影:黎子豪

查詢電話:3191 2333