7.69mm薄切P1省電王

呢排GALAXY Note II同iPhone 5排住隊出，仲邊有廠商夠膽同佢哋對撼！然而凡事冇絕對，國產大牌華為（Huawei）偏偏喺呢個時間推出薄切機王Ascend P1，不僅厚度得7.69mm，於4.3吋智能手機中數一數二，仲可以煲足8小時電話，備用時間長達18天；最重要係標價唔高，絕對有能力與一眾機王周旋到底！

預載Android 4.0智能系統，提供最多7版首頁。<BR>售價︰$3,680

預載Android 4.0智能系統，提供最多7版首頁。
售價︰$3,680

擺脫國產味

Huawei貴為全球最大網絡裝置代工商之一，早於年初CES展覽時便曾發布全球最薄、僅厚6.68mm的Ascend P1S，震撼手機界！今次呢部P1係同門師弟，雖然厚度冇咁誇，但依然只有7.69mm，目測下同一塊餅乾差唔多，而且重量僅得110g左右，就算女仔使用都貼手舒適。外形上它亦擺脫國產味道，焗漆鋼琴面配Corning Gorilla超強防刮玻璃，令4.3吋芒的畫面分外鮮明。唯一缺點係容易印上手指模，需要勤加清潔。

超低電壓模式

機身纖薄，但世上冇免費午餐，咁薄自然有代價，就是它採用一體成形設計冇得拆蓋。除咗SIM卡要於機頂安裝外，冇起電上嚟都冇得換電池。幸好，廠商在機內植入智能電源管理技術，開啟後能夠節省30%耗電量，提供最多8小時通話時間，以Smartphone來說夠晒長氣！一如上代設計，P1可進入超低電壓模式，令關機後只需5秒便能快速啟動，比正常啟動時間快幾倍。

800萬像素鏡頭配雙補光燈，硬件規格不俗。

由於冇電池蓋，所以SIM卡槽設於機頂位置。

支援雲端備份

作為中價機，P1名氣當然不及GALAXY、iPhone等大牌，但硬件卻意外地不弱，預載Android 4.0平台之餘，還配備1.5GHz雙核心處理器及1GB RAM，小記用來打機、上網都暢通無阻，可以講係目前Huawei最快嘅手機之一。鏡頭方面，800萬像素鏡頭加雙LED補光燈，規格相當不錯；拍攝時更可同步加入不同的哈哈鏡及場景效果，Snapshot夠晒玩味。特別一提，此機還對應16GB Huawei Cloud+雲端儲存空間，用來備份靚相就最適合不過！