8月的香港戾氣濃烈，國民教育、高官劏房、釣魚台爭議、十招救樓市、自由行大解放、新界深圳大合併，無一不叫人光火或者令人心灰，瞄瞄整個香港，只有100隻多啦A夢，能讓全港市民回復微笑。
不得不承認，「你睇！！多啦A夢嚟啦！誕生前100年祭」大型展覽，不但成為商場史上經典，亦是近年最人氣本地活動，明明只是一項商業性推廣，偏偏比起香港小姐選舉、回歸文藝晚會以至奧運金牌選手匯演，為普羅市民帶來更窩心、更歡樂及更多美好回憶。
每個周末，眼見商場人山人海，目睹大批熟年男女，穿着不同款式的多啦A夢T恤，在多啦A夢旁邊擺甫士，到商場內過冷河，於多啦A夢主題Cafe搶購豆沙包與曲奇餅，真的覺得匪夷所思，40歲過外的朋友仍然充滿童真，都是拜「叮噹」於70年代初陪伴成長所致。
我總覺得，既然穿上多啦A夢T恤，就要做足全套，神情面貌舉手投足應保持Kawaii，可惜香港人生活壓力太大（是政府的錯吧），掛上笑容者少，猴急狼狽拍照購物者多，我更曾目擊一位穿多啦A夢T恤的師奶，發脾氣狂鬧百厭頑皮仔，與身上的溫柔粉藍色呈正邪對比……
今天是多啦A夢生日，海港城於中午12時半舉行生日派對，穿着多啦A夢T恤的朋友，好歹也要畀面壽星貓，笑着慶祝吧。
網址：www.chan-wai.com