SOS冷知識遇險解圍

疑團1

行山時收唔到電話訊號，點解都可用電話進行緊急呼救？

解密

由於山勢起伏，山上並非所有位置都能收到網絡訊號，萬一進入網絡盲點，其實都可嘗試撥打緊急電話。香港通訊事務管理局解釋：「假如行山人士身處的位置接收不到A台訊號，但只要位處B台的網絡覆蓋範圍，都能夠透過B台撥打國際求助電話112，或本港的999。就算部電話唔插SIM卡，一樣可利用網絡撥打緊急求救電話。如果訊號收得唔好，找不到任何網絡，不妨走到較高位置，會大大提升訊號的接收機會。」而通訊事務管理局的網頁（www.ofca.gov.hk），內有詳盡資料。

原來手機唔插SIM卡，一樣可撥打緊急電話112或999。	緊急求助電話冇特定距離位置，行山時記得睇清楚郊野公園地圖。	就算準備對講機行山，都唔可以亂用頻道，因為第9頻道只限緊急通訊用途。

疑團2

睇電影見人求救時用電筒閃來閃去，係唔係摩斯密碼SOS？

鍾Sir表示行山最妥當係帶備指南針，部分備有鏡面，以便反射光線發出求救訊號。	雙手揮動呈Y字表示需要救援，而單手揮動像N字表示毋須幫忙。	放大圖片

解密

攀山專家鍾建民表示：「其實摩斯密碼只係睇戲先用到，國際性的緊急求救方法係1分鐘內閃燈或吹銀雞6次，即係大約每10秒就要閃或吹1次；假如接收到對方的求救訊號，回覆對方就應該在1分鐘閃燈或吹銀雞3次。仲有一個Code我們需要留意，假如求救時救援直升機發現你，千祈唔好用單手揮手。國際求救訊號單手揮手代表No，因為睇上去似個N字；而雙手揮手係代表Yes，睇上去似個Y字。曾經有位法國資深嚮導同拍檔爬山，期間拍檔受傷需要救援，但由於同直升機溝通時佢只係單手揮動，救援人員以為佢唔需要協助，最後導致拍檔失救而死，所以之後有些行山用品都特別加上求救資訊。」

救命三寶 盡量避免攜帶內有珠子的哨子，因一旦濕水便難以吹響。售價：約$70	電筒或頭燈係救命的主要工具，多於夜間使用。售價：$150~$800	銀色反光面Blanket，既可在日間反射陽光發出求救訊號，鋪在地面也可阻隔濕氣和保暖。售價：約$45
GPS裝置能清楚顯示坐標，而部分甚至具有地圖顯示功能。	放大圖片

疑團3

智能手機的GPS跟行山用的GPS有何分別？

解密

資訊科技商會會長方保僑稱：「智能手機如iPhone所使用的GPS，大多利用網絡訊號定位；而行山GPS卻內置真正的定位晶片，這些GPS裝置以接收3~4枚衞星進行準確定位，一些新型GPS裝置更會記低最後的坐標，以便翻查紀錄。當然，智能手機在定位的準繩度一定冇行山GPS咁準，但後者又未必部部可顯示地圖。至於GPS裝置的價錢，主要根據續航力、定位時間、準繩度等而定，一些貴價的GPS定位較快，對行山遠足有一定的幫助。」鍾建民補充：「我在香港行山好少帶GPS，因為智能手機的GPS並不100%準確，亦沒有顯示經緯度，不可過分倚賴。反而行山的前期準備工夫更重要，建議事先計劃好，清楚了解路線，而且一定要帶地圖同指南針。」

SOS知多啲

SOS的摩斯密碼為「．．．－－－．．．」即是「3短音3長音3短音」，早於1905年被採用，常被理解作Save Our Ship（拯救我們的船），但當初制訂時沒有這意思，純粹是因為這摩斯密碼易記。

路段知多啲

荒山野嶺又冇路名，求救時如何得知自己位置？其實本地的主要郊遊徑，每500米便會豎立一支標距柱，求救時只要講出標距柱號碼和格網坐標，救援人員便知道你的正確位置。

查詢電話：2388 3626

撰文：黎子豪

攝影：胡振文

模特兒：SeeSee Lee