旅遊方法有好多種，有錢當然好辦事，冇錢又唔等於要做井底之蛙，只要你願意結交志同道合的「旅」友，又唔介意借宿陌生人家，就即刻有計！CouchSurfing梳化借宿於歐美盛行已久，為旅行發燒友提供交流的好機會；箇中的文化交流與體驗，亦非一般行程可比！想知道呢個另類旅遊體驗點Work？由達人Alexander Lee（阿大）現身說法，隨Step附送溫馨提示，瞓梳化極速上手！
要瞓梳化，首先要知道去邊度搵梳化，為推廣「再窮都可以去旅行」及「另類旅遊體驗」，CouchSurfing有一個官方組織，記住www.couchsurfing.org呢個網址，就可以免費註冊，展開借宿N部曲。
溫馨提示︰
成為會員費用全免，但註冊時會出現住址及身份驗證頁面，要求你以信用卡網上付款，以提高你個人資料的可信性，注意該驗證程序是自願的，即使不付款驗證也可以成為會員。
一個Host（梳化主人）決定是否收留Surfer（梳化客），主要靠詳細的Profile，其實只係年齡、性別、職業、語言及旅遊經驗等基本而又可以提供初步印象的資料，人哋連家門都為你開，唔通你連少少資料都唔肯「些牙」？
溫馨提示︰
Profile的作用，其實同剛相識的朋友作自我介紹一樣，就好似你都想搵個「啱嘴形」的Host咁，所以切勿作出虛假陳述。
絕對不是以貌取人，但Profile Pic的確很重要！不一定要英俊不凡美若天仙，CouchSurfing不是相親，只是到相認時較方便。
完成Profile，就可以用「Surf」按鈕以目的地搜尋Host，再從結果列表中揀選意中人，但千萬不要心急，記得Click入去睇Profile全相，細閱對方所寫的借宿條件等，一來保障自己安全，二來可以再次確定Host身份。別以為CouchSurfing只適用於旅遊城市，記者試搵過，連平壤都有人願意借出梳化，當然，能否入境就閣下自理啦！
溫馨提示︰
注意！2009年曾有本港女Surfer於英國借宿期間被她的摩洛哥男Host強姦，至今網上部分男性Host仍寫明只招待女Surfer，基於安全理由，絕不建議挑選！
細閱Profile時，記得留意References一欄，是留宿過的Surfer或接待過的Host之留言及評語，評級有Positive（正面）、Neutral（中立）和Negative（負面），只要有Neutral和Negative的，都值得重新考慮。
即係咁，你想借人家梳化瞓，都要人家肯先得嘅！要讓心儀的Host知道你的心意，就要發送Request，除了介紹自己，仲要講下點解想借宿對方梳化，覺得對方有咩引起你興趣，或者大家有咩共同話題之類。記住！CouchSurfing唔止係免費住宿，更重要係一個交友體驗，所以Host願唔願意收留你，好多時取決於誠意同啱傾程度，Request寫成點，就係誠意的反映，建議當中可以提及共同興趣，以示你有用心睇過佢個Profile。
溫馨提示︰
Profile要達到一定完整程度方可以發送請求，所以在計劃借宿前先乖乖做功課。
對於新手來說，Request更為重要，因為欠缺References，Host只能憑Request決定是否接收這個Surfer。
到達目的地前2~3星期開始搵梳化最好，太早的話，Host未必知自己Schedule，太遲又可能回覆唔切。
如有大件行李（去歐洲踩單車流浪，去到邊都要留個車位），記得預先說明。
發送請求、等待回覆、確定借宿等一輪溝通後，終於到了入住的時候，可以好好體驗不一樣的旅程。
溫馨提示︰
部分Host對梳化客十分信任，會留低鎖匙，甚至自己出門都留低間屋畀Surfer，不過記得自律，切勿辜負別人的信任。
雖然沒有明文規定，但Surfer一般都會作出貢獻，答謝招待，個人喜歡煮中國菜招呼新朋友，因為食物是很好的文化交流。
《擁抱伊朗》作者，剛完成9個月單車歐洲流浪之旅，CouchSurfing經驗遍布歐洲、非洲、大洋洲及亞洲。自言好好彩的他，多次遇上好客Host，變身導遊不特止，更招待每日3餐，令捱慣麵包的他深受感動。
撰文︰吳倩瑩
部分相片︰由受訪者提供