兩年幾前《Darksiders》以黑馬姿態跑出，續集《Darksiders II》自然受機迷期待，經過兩個月延期，遊戲終於在今日開賣。上集以天啟騎士War（戰爭）做主角，今集就輪到兄弟Death（死亡）擔正，一身死神造型夠晒霸氣！而上集一致好評嘅地下城和解謎系統亦繼續強化，遊戲地圖仲大上３、４倍，趁暑假仲有半個月時間，定要煲番夠本！
《Darksiders》的故事核心係4位天啟騎士War（戰爭）、Death（死亡）、Fury（憤怒）同Strife（紛爭），上集講4位騎士被封印住，集眾人之力原本可以打敗邪惡勢力，但War卻被焦灼議會跣咗一鑊，只有佢被召喚出來打魔王，結果慘成磨心畀天堂、地獄同焦灼議會三面圍攻。到新作《Darksiders II》就交由兄弟Death出番一口氣，齋睇佢一身死神造型已夠霸氣，而且一出場已備有坐騎「絕望」，可以用佢嘅絕招幫手對付敵人。
唔止坐騎幫到手，今集主角更可召喚烏鴉出來帶路，對於成日要喺地下城團團轉或者大版圖上游走，烏鴉相當有用。遊戲開發商表示，《Darksiders II》每幅地圖都比上集大3、4倍，更收錄了多個區域，冇坐騎或者烏鴉幫手真係會玩到人都癲；而且唔少區域要用攀爬和道具先過到。由於地圖和故事偏向黑暗，如果仲用埋陰暗色調，玩家實打到眼瞓，所以新作改以鮮艷的美式漫畫風格設計，感覺更添活力。
戰鬥同武器系統得以強化，令主角手持的武器能做出更多樣化的招式，而且攻擊範圍夠大，唔使吓吓埋身肉搏。此外，新加入的附魔武器系統，可以特定道具提升武器的經驗值，甚至能替武器改名，打造出絕世神兵！值得一提，如果玩家擁有上集嘅Save檔，一玩便可得到護甲，增強Death嘅防守力；如之前打爆過《Darksiders》的話，仲可得到等級1的傳奇鐮刀，就算面對Boss都唔使怕。自問技術超卓，仲可以挑戰一死即Game Over嘅「噩夢」模式，睇吓用一條命可唔可以打爆機！
類型：動作
開發：Vigil Games
平台：Xbox 360、PS3
售價：約$400
查詢電話：2359 7998
撰文：布偉倫