Nexus 7驚喜四核Jelly Bean

好多小朋友都鍾意食Jelly Bean糖果，有成幾十種口味，仲可以配搭出不同味道，驚喜十足。勢估唔到Jelly Bean數碼產品同樣帶畀大家意想不到的感覺，講緊嘅係剛從水路到港、首載Android 4.1（代號Jelly Bean）系統的7吋平板電腦Nexus 7，採用四核心處理器、IPS屏幕等超班規格，加上大大強化觸控反應和圖像傳輸效能，換頁、操控從未如此流暢。縱使水貨被炒貴近一倍，依然有理力捧！

售價：$2,980

ASUS代工 7吋觸感

第一代以Google品牌推出嘅手機Nexus One是由HTC代工，而首部Google平板Nexus 7亦由同屬台灣廠商的ASUS代工。雖然長方形機身的外表略嫌平凡，但一體成形背殼用上聚碳酸酯物料，加上圓點花紋作點綴，摸落唔跣手，340g勁輕身！而7吋屏幕則採用IPS面板，色水自然又唔偏色，解像度達1,280×800；不過因為屏幕比例關係，睇HD影片時會留有黑邊，比較礙眼。

激平機價超班硬件

雖然Google推出自家平板電腦是意料中事，但Nexus 7發布後仍有極大回響。原來新機分別備有8GB、16GB兩個版本，定價只是199美元（折約HK$1,548.2）及249美元（折約HK$1,937.2），竟內置Tegra 3四核心處理器、1GB RAM等強勁規格，比其他大廠嘅同級機種平近一半，山寨機都即時比下去！不過有得亦有失，新機一來不設3G版本，上網只能靠Wi-Fi網絡，二來沒有後置鏡頭，Snapshot無門；最唔方便係不設記憶卡槽，擺歌、入片要就住就住。

水貨到港嘅係白色版本，聚碳酸酯機背備有「NEXUS」字樣壓印。

10.45mm唔算好薄，但斜邊設計加強了手感。

火牛用美國兩腳插頭，香港用家要加轉插！

優化系統新版順暢

Nexus 7另一賣點是預載全新Android 4.1（代號Jelly Bean）系統，Google表示系統特別對圖像處理、觸控反應等進行優化，小記試用後，發現舊系統不時出現的Delay感覺已不復見！而Jelly Bean的功能比上代更趨完善，備有詳細的狀態欄；新功能Google Now的頁面可自動顯示航班、天氣等實用資訊，以及將《Chrome》預設成瀏覽器，感覺唔錯。要留意的是，Google於外地主打的Magazines、Music及eBooks等新功能，香港暫時都用唔到。