EVA手機絕對領域防窺視

「碇真嗣，係時候出動啦，你仲慢吞吞搞乜嘢！」「明日香你咪阻住晒，我玩緊手機！」「使徒打到嚟你仲玩手機？」「呢部係NERV總部同DoCoMo合作嘅Smartphone，有齊新劇場版《Q》嘅立體預告片、三賢人Unlock介面同絕對領域防窺視屏幕，我依家玩緊隻Game仲教埋我打使徒，你咪阻住晒啦！」

橙色主頁可加入不同Widgets，時刻監察電量、記憶體狀態。

限量30,000部

作為一個動畫迷，第一最愛係《高達》，第二最愛一定係《新世紀福音戰士》。適逢劇場版第3部《Q》上映在即，DoCoMo繼09年的EVA初號機後，日前再推全球限量30,000部的二號機。小記甫收到機，即刻有主角碇真嗣初遇使徒時的震撼，皆因機身帶有極濃厚的EVA元素，先是機側、天線印有「NERV ONLY」字樣，連說明書都用了動畫的專屬字型，最正係附送的兩款電池蓋「Type:NERV」及「Type:MAGI」分別用灰色及銀色鏡面設計，並以總部外形為藍本的細緻花紋作點綴，完全「粉絲向」！

三賢人解鎖

功能方面，4.5吋高清AQUOS屏幕、800萬像素鏡頭、1.2GHz雙核心處理器及IPX7防水規格都係基本嘢，最叫人「暴走」的是廠方把Android公版換成自家設計。橙紅色介面本身已叫人血脈沸騰，用戶更可按需要加入不同Widgets，時刻監察電量、處理器佔用率、剩餘記憶體、天氣及時間等狀態，配合3D裸眼技術，令操作猶如身處駕駛艙一樣，High到不得了。更High的還有Unlock介面，只要把「同步率」圖案拉到上方「三賢人」一邊即能解鎖，唔講仲以為自己主角上身。

預載劇場版《Q》立體預告片，並可坐枱擺放兼充電。

附送灰色及銀色鏡面電池蓋，圖案精美。

機背備有800萬像素鏡頭，並設有LED燈作補光。

激凸綾波麗

作為「第二次衝擊」，單係以上內容仲未夠，手機還預載了大量EVA元素，除了綾波麗、明日香及真希波的Wallpaper外，它還將VeilView防窺視功能改良，把以往的花花圖案換成「絕對領域」，旁人側望屏幕只看到防護罩圖案，想撕破唔係咁易！另外，手機預載了新劇場版《Q》的未曝光3D預告片，初號機、綾波麗一齊從裸眼3D屏幕彈射而出，叫人深深感動；加上機身可橫放於「發射台」邊充電邊睇片，保證宅男們熱淚盈眶！