東涌灣啟航 獨木舟觀賞豚
大熱天時想出海玩，又嫌船P、Wakeboard玩到悶，今次一於為大家介紹獨木舟生態遊。咪以為一班人喺海上划艇實好悶，原來只要上個基本課程、掌握好技巧，便可以去鄰近機場嘅東涌灣，近距離接觸紅樹林，甚至上岸搵招潮蟹和彈塗魚；划遠少少的話，仲有機會見到中華白海豚蹤影，集夏日運動與生態學習於一身！
撰文：林子聰 部分攝影：謝孝祥
模特兒：Sze Cheung（M.Spy Model）
查詢電話：（a）2430 0330、（b）2376 2150、（c）2361 7228
風平浪靜東涌灣
距離東涌逸東邨約10分鐘路程的侯王宮，面向嘅就係東涌灣。原來東涌灣一向係水上活動愛好者的聚腳地，皆因四周被山脈包圍，天然屏障下令到小灣不受強風、大浪所影響，資深獨木舟教練一哥話：「東涌灣基本上無風無浪，又有一定空間，非常適合獨木舟初學者！」
濕地睇生態
東涌灣沙泥沉積、潮汐環境極適合紅樹林生長，所以沿岸邊划艇時，會見到一大片海漆、水筆仔等植物。而東涌河口更係生態要地，趁河口退潮時，可落泥灘休息一會，小記眼見現場除咗有唔少人摸蜆之外，近岸紅樹林邊仲見到招潮蟹、彈塗魚，甚至是較稀有的馬蹄蟹出沒！要留意的是，東涌灣、東涌河每逢潮漲時水可及胸，而且每日潮退時間不一，划艇或落艇時要格外留意。
尋海豚之旅
若熟習咗扒獨木舟技巧後，一哥推介出海睇中華白海豚。東涌灣分東、西兩面出口，東面對岸係屯門，而西面則為沙螺灣及大澳；只要沿沙螺灣向北扒，便會見到沙洲和龍鼓洲，而附近一帶正正係中華白海豚出沒嘅海域。不過出到海未必一定遇到中華白海豚，所以一哥話獨木舟友一般會喺海中逗留大概一至兩小時碰運氣，緣分未到就要回程返東涌o架喇！
專家建議
資深獨木舟教練一哥表示：「其實獨木舟唔難玩，最緊要有興趣同唔驚水！只要具備一星章資格，基本上已經可進行近岸活動，想玩遠啲就建議大家有三星章資格！而每個星章訓練班只需參加一天朝9晚5課程即可！」
裝備一覽
玩獨木舟嘅裝備其實好簡單，除咗槳同艇外，最重要係着番件救生衣同埋保護鞋；大家亦可帶備太陽眼鏡及帽子等防曬用品。
划艇招式知多啲
划艇基本動作主要分前槳、後槳、停船及掃槳4種：
前\後槳：前槳的動作似自由式手法，後槳動作則相反；划水時幅度要大，手月爭亦要提高。
停船：用槳葉垂直插於艇身兩邊，用來阻水即可。
掃槳：用以調整划船角度，用些少腰力將船槳由艇頭掃向艇尾。
水中拍攝利器
難得見到紅樹林、招潮蟹，當然要留影做紀念，1,200萬像素的Olympus TG-620不但採用金屬外殼，機身更備有黑色軟膠作保護，5米水深、1.5米撞擊都頂得住，帶埋去划艇影相最為適合！而且喺關機狀態時長按「？」鍵幾秒，仲可以當埋電筒用呢！售價：$2,290（b）
DiCAPac WP-S10 單反拍海豚
中華白海豚神出鬼沒，隨時露出水面，要用單反才可捕捉到佢哋嘅蹤影。一般單反機雖然落唔到水，但配合DiCAPac WP-S10保護套即刻搞掂。機套不但可抵受5米水壓，亦通過日本第8級防水測試，隔住機套都可以Zoom近海豚。
售價：$980（c）
邊度有得學？
屯門獨木舟會定期舉行訓練班及活動，例如獨木舟旅程同樂日、獨木舟一星章訓練班，費用每人大約$130起，有專業教練於近岸教你基本動作及划艇技巧。同時獨木舟會亦提供租艇服務，一天$100，不過限定2人或以上租艇，而且必須持有獨木舟總會三星章或以上的資格。（a）