Xperia go水陸兩棲

早幾日8號風球襲港，橫風橫雨都預咗周身濕，最麻煩係連手機都唔敢拎出嚟用。Sony新推出的Xperia go便打破一般手機「忌水」嘅缺點，莫講話傾盆大雨，掉佢落水玩足30分鐘都冇問題，配合防刮花靚芒及防塵機身等至Tough功能，遇着打風或玩水上活動都可以大派用場！

售價：$2,498（7月9日推出）

落水唔使怕

Smartphone嘅功能多到講唔晒，奈何一遇到水，隨時機都開唔到。Xperia go卻符合IP67防塵及防水認證，IP係International Protection Rating簡稱，數字「6」代表最高嘅防塵標準，基本上任何灰塵都入唔到機內；而「7」則指手機喺1米水深下，可正常操作30分鐘，唔小心跌咗部機落水都唔使報銷。要留意的是，同其他三防手機一樣，機身的microUSB、3.5mm Audio插口全部設有保護蓋，落水前記住閂埋！

屏幕防刮花

防水、防塵已經夠巴閉，估唔到新機屏幕耐刮能力仲強，特別選用防刮劃礦物玻璃屏幕，唔怕被鎖匙、銀仔等硬物整花之餘，小記即場用刀片狂刮其3.5吋芒，佢都絲毫無損，連屏幕保護貼都可以慳番！另配合獨家Mobile BRAVIA Engine，顯示色彩、層次更加分明；加上支援Wet Finger Tracking技術，濕咗手篤芒依然準確無誤。唯一要彈是屏幕解像度得480×320，近睇時明顯見到微粒，睇網頁差咗少少。

長方形設計都幾靚仔，當中以黃色最搶眼。

背殼採用一體式設計，機內顏色一樣搶眼。

機身的骰搶眼

舊時三防機嘅設計大多核突兼大舊，新機卻一反傳統，不但細過iPhone 4S，更只有9.8mm厚度及110g重量，拎上手超輕便；而且長方形機身仲有黑、白、黃3種配色，當中以黃色最搶眼！雖然新機只沿用Android 2.3系統，但卻搭載1GHz雙核心處理器，操作時完全冇Delay，另內置多款運動Apps，包括計步程式《Walk Mate》、練跑專用的《FigureRunning》等，今個夏天帶埋新機去Keep Fit就啱晒啦！